Umfjöllun og viðtöl: Víkingur R - Tindastóll 2-1

Reykjavíkur Víkingar eru komnir í átta liða úrslit Borgunarbikarsins en liðið vann nauman sigur á Tindastóli í kvöld.

Leikurinn fór mjög fjörlega af stað og heimamenn komust strax í forystu á 2. mínútu. Þá skoraði Aron Elís Þrándarson glæsilegt mark úr þrumskoti eftir góðan sprett upp völlinn.

Á á 8. mínútu fengu Víkingar vítaspyrnu þegar Halldór Smári Sigurðarsson var felldur inn í teig. Gamla kempan, Hjörtur Júlíus Hjartarson, skoraði af punktinum. Staðan orðin 2-0 eftir átta mínútur. Algjör óska staða fyrir heimamenn.

Eftir seinna markið voru Víkingar mun líklegri í öllum sínum aðgerðum. En á 22. mínútu þá minnkuðu Stólarnir muninn með ágætri sókn. Atli Arnarsson átti þá skot sem Ingvar Kale varði út í teig. Christopher P. Toris var réttur maður á réttum stað og nær frákastinu og skorar.

Strákarnir úr Skagafirðinum lifnuðu allir við og áhorfendur aftur komnir með leik. Á 59. mínútu  fékk Christopher, markaskorari Tindastóls, að líta rauða spjaldið fyrir brot á Igor Taskovic, varnarmanni Víkings.

Dómarinn gaf honum rauðaspjaldið fyrir að setja takkanna í hausinn á Igor þar sem Christofer lá í grasinu.

Eftir það þyngdist róður Tindastóls og lengra komust þeir ekki í leiknum. Víkingar unnu leikinn 2-1 og eru komnir áfram.

Halldór: Mörg lið hefðu gefist upp og brotnað

„Algjör vonbrigði að tapa þessum leik. Mér fannst við sýna góða baráttu og koma tilbaka eftir þungt rothögg í byrjun leiks. Mörg lið hefðu gefist upp og brotnað en við sýndum góðan karakter,“ sagði Halldór Jón Sigurðarson, hinn ungi þjálfari Tindastóls, eftir leikinn og bætti við:

„Ég sá ekki atvikið í rauðaspjaldinu nógu vel en á þeim kafla vorum við að nálgast þá. Þá hefði í raun allt geta gerst. En við lendum einum færri og þá varð þetta allt mun erfiðara.“

Fannst þér þetta grófur leikur?

„Nei nei, þetta var alvöru fótboltaleikur. Alvöru karlmenn að eigast við og góður leikur að mörgu leyti og ansi svekkjandi að tapa.“

Óli: Þeir voru að fiska spjöld og dómarinn beit á agnið

„Við ætluðum okkur áfram svo þetta er bara gleði og ánægja,“ sagði Ólafur Þórðarson, þjálfari Víkings, kátur eftir leikinn.

„Mér fannst þetta ekki eins harður leikur og dómarinn gaf ástæðu til. Þeir voru að henda sér niður alveg hægri vinstri, fiskandi spjöld og dómarinn beit svolítið á agnið fannst mér.

„Við sigldum þessum sigri heim og það var það sem við ætluðum okkur.“

Er það einhver óska mótherji sem þú vilt fá í næstu umferð?

„Já Já, það er það en ég ætla ekki að segja þér það,“ sagði Óli Þórðar léttur í lokin.