Þorvaldur gerði ótímabundinn samning við ÍA

Skagamenn eru búnir að ráða Þorvald Örlygsson sem þjálfara liðsins. Hann tekur við starfinu af Þórði Þórðarsyni sem hætti á mánudag.

Nafn Þorvalds kom fljótt upp í umræðunni en hann hætti með Fram fyrir skömmu síðan og var í kjölfarið talsvert orðaður við Þróttara.

Þorvaldur skrifaði undir samning við ÍA nú síðdegis. Samningurinn er ótímabundinn með venjulegum gagnkvæmum uppsagnarfresti.

Það þýðir væntanlega að samningurinn er uppsegjanlegur í lok hvers tímabils eins og tíðkast hjá flestum íslenskum liðum.

Á heimasíðu ÍA kemur fram að viðræður hafi hafist í gærkvöldi og gengu þær hratt og vel fyrir sig.