Hvetja til breytinga á lista Sjálfstæðisflokksins

Framkvæmdastjórn Landssambands sjálfstæðiskvenna hefur sent frá sér yfirlýsingu þar sem þær hvetja til þess að konur verði í áhrifastöðum á lista Sjálfstæðisflokksins í Reykjavík.

Þær hvetja kjörnefnd flokksins til að gera breytingar á listanum sem boðinn verður fram fyrir borgarstjórnarkosningar í vor og segja að til þess að geta horft björtum augum til framtíðar undir stjórn Sjálfstæðisflokksins þurfi fulltrúar beggja kynja að vera í áhrifastöðum.

Í efstu þremur sætum flokksins eftir prófkjör í nóvember eru Halldór Halldórsson, Júlíus Vífill Ingvarsson og Kjartan Magnússon. 

Formaður stjórnar Landssambandsins er Þórey Vilhjálmsdóttir, aðstoðarmaður Hönnu Birnu Kristjánsdóttur innanríkisráðherra. Fyrrverandi formaður sambandsins, Jarþrúður Ásmundsdóttir, hafði áður tjáð sig um þennan rýra hlut kvenna og sagði það að stilla þremur körlum upp í efstu sætum gæti ekki talist sigurstranglegur listi.

Yfirlýsingin í heild er svohljóðandi:

Framkvæmdastjórn Landssambands sjálfstæðiskvenna harmar hversu hlutur kvenna er rýr í efstu sætum lista flokksins fyrir borgarstjórnarkosningar í Reykjavík í vor ef niðurstöður prófkjörs verða látnar standa og hvetur kjörnefnd til þess að nýta sér það svigrúm til breytinga sem nefndin hefur.

Framkvæmdastjórnin hvetur kjörnefnd til þess að hafa það í huga að helmingur borgarbúa eru konur og því mikilvægt að þær veljist til áhrifa ekki síður en karlar.

Með þrjá karla í efstu sætunum er því miður ekki hægt að halda því fram að konur muni hafa þar áhrif.

Það er mikilvægt fyrir borgarbúa að Sjálfstæðisflokkurinn nái góðu kjöri og komist til áhrifa í borgarstjórn.

Borgarbúar eru orðnir langþreyttir á gjaldskrárhækkunum, litlu aðhaldi í rekstri borgarinnar samhliða verri þjónustu.

Skólakerfið og rekstur þess er einnig orðið mikið áhyggjuefni í ljósi nýjustu kannanna um árangur nemenda.

Til þess að ná því markmiði að geta horft björtum augum til framtíðar undir traustri stjórn Sjálfstæðisflokksins í Reykjavík - þurfa að vera fulltrúar beggja kynja í áhrifastöðum.