Nemendur Tækniskólans lengur að ljúka stúdentsprófi

66% nemenda sem hófu nám í framhaldsskóla á bóknámsbraut árið 2007 höfðu lokið námi vorið 2013. Alls hófu 3.565 nemendur nám haustið 2007 og höfðu 2.233 lokið námi í vor. Meðallengd námstíma þessara nemenda var 4,2 ár. Þetta kemur fram í svari menntamálaráðuneytisins við fyrirspurn Svandísar Svavarsdóttur, þingmanns Vinstri grænna.

Nemendur við Framhaldsskólann í Vestmannaeyjum voru að meðaltali fljótastir að ljúka stúdentsprófi og var meðalnámstími nemenda við skólann 3,6 ár. Fjölbrautaskóli Vesturlands og Menntaskólinn á Egilsstöðum eru jafnir í öðru sæti en meðalnámstími nemenda skólanna var 3,9 ár.

Það tók nemendur við Tækniskólann lengstan tíma að ljúka stúdentsprófi og er meðalnámstími nemenda við skólann 5,2 ár. Fjölbrautaskólinn í Ármúla og Fjölbrautaskólinn í Breiðholti koma í kjölfarið en meðalnámstími í skólunum var 4,9 ár.

Bekkjaskólar útskrifa fyrr

Meðallengd námstíma á bóknámsbrautum í bekkjarskólum er 4,1 ár. Meðallengd námstíma á bóknámsbrautum í áfangaskólum er 4,3 ár.

Af innritunarárgangi 2007 sem innritaðist á bóknámsbrautir luku 2.233 stúdentsprófi, sem skiptist þannig að 907 luku prófi í bekkjarskólum eða 41% og 1.326 luku prófi í áfangaskólum eða 59%.

Dreifingin á útskriftum á þessu sex ára tímabili er mjög misjöfn eftir bekkjarskólum og áfangaskólum. Í bekkjarskólum luku 92% námi á fjórum árum, 0,5% á skemmri tíma en fjórum árum og 7,5% á lengri tíma.

Í áfangaskólum luku 34,1% námi á fjórum árum, 23% á skemmri tíma en fjórum árum og 42,7% á lengri tíma. Bekkjarskólar eru Verzlunarskóli Íslands, Menntaskólinn í Reykjavík, Kvennaskólinn í Reykjavík, Menntaskólinn við Sund, Menntaskólinn á Akureyri og Menntaskólinn að Laugarvatni.

Brautskráningar innritunarárgangs 2007 sem innritaðist á bóknámsbrautir

og hafði útskrifast með stúdentspróf ekki seinna en vorið 2013.

Skóli	Fjöldi brautskráðra stúdenta	Hlutfall af brautskráningum árgangsins	Meðalnámstími
Verzlunarskóli Íslands	290	13,00%	4
Menntaskólinn við Hamrahlíð	218	9,80%	4
Menntaskólinn í Reykjavík	169	7,60%	4,1
Menntaskólinn á Akureyri	148	6,60%	4,1
Menntaskólinn í Kópavogi	147	6,60%	4,4
Kvennaskólinn í Reykjavík	138	6,20%	4,1
Menntaskólinn við Sund	131	5,90%	4,1
Fjölbrautaskólinn í Breiðholti	109	4,90%	4,9
Fjölbrautaskóli Suðurnesja	107	4,80%	4,1
Fjölbrautaskóli Suðurlands	92	4,10%	4
Verkmenntaskólinn á Akureyri	90	4,00%	4,6
Flensborgarskólinn í Hafnarfirði	77	3,40%	4,1
Borgarholtsskóli	74	3,30%	4,5
Fjölbrautaskólinn í Garðabæ	67	3,00%	4,2
Fjölbrautaskóli Vesturlands	63	2,80%	3,9
Fjölbrautaskólinn við Ármúla	47	2,10%	4,9
Tækniskólinn	45	2,00%	5,2
Menntaskólinn á Egilsstöðum	38	1,70%	3,9
Menntaskólinn að Laugarvatni	31	1,40%	4,1
Menntaskólinn á Ísafirði	26	1,20%	4,1
Framhaldsskólinn í Vestmannaeyjum	25	1,10%	3,6
Fjölbrautaskóli Snæfellinga	22	1,00%	4
Alls	2.233		4,2

Heimild: Mennta- og menningarmálaráðuneytið, 2013.