Kærleikskerti til styrktar Fjölskylduhjálp

Fjölskylduhjálp Íslands hefur hafið framleiðslu á útikertum, undir heitinu Kærleikskerti, sem selja á til fjármögnunar matargjafa um jólin. Þau eru framleidd frá grunni af sjálfboðaliðum við húsnæði Fjölskylduhjálpar í Iðufelli. Nú eru nokkur þúsund kerti klár, sem fara í sölu á fimmtudaginn. Fjölskylduhjálp hefur keypt 22 tonn af mör sem nota á til kertagerðarinnar.

Kertin verða til sölu á stór-Reykjavíkursvæðinu í húsakynnum Fjölskylduhjálparinnar að Iðufelli 14, á bensínstöðvum Skeljungs, í verslunum Krónunnar, Nettó, Hagkaupa og í Garðheimum. „Kertin kosta 590 krónur og hver einasta króna rennur í matarsjóðinn. Við fengum 48.000 miða gefins frá Litla prenti, öll hönnun hjá Marko merkjum var gjöf, hús frá Hafnarbakka undir framleiðsluna, stórtækar vélar til að mylja mör fengum við lánað frá Esju kjötsmiðju og Samkaup gaf okkur risastóra eldavél. Allsstaðar mætum við góðvilja. Tilkostnaðurinn er enginn nema kaup á dósum, mör og kveikiþráðum,“ segir Ásgerður Jóna Flosadóttir formaður Fjölskylduhjálpar Íslands í samtali við Vísi.

Kertin eru framleidd af sjálfboðaliðum og nú eru nokkur þúsund kerti klár sem fara í sölu á fimmtudaginn næstkomandi. „Þetta er kraftafólk sem gerir þessi kerti í sjálfboðavinnu. Mér finnst þetta alveg rosalega flott framtak hjá sjálfboðaliðunum og þau auga heiður skilinn fyrir."

Kertin hafa fjölda viðeigandi áletrana til þeirra sem hægt er að tileinka kærleikskertið, alls 16. „Þetta eru allt mjög fallegar áletranir," segir Ásgerður.

Þörfin fyrir jólaaðstoð frá Fjölskylduhjálpinni hefur sjaldan verið meiri en núna og þegar hafa borist um 700 umsóknir um aðstoð. „Við munum aldrei geta þjónað öllum og líklega þurfa margir frá að hverfa. Við ætlum að reyna að afgreiða alla sem við getum, en sá fjöldi sem fær fullkomna jólaaðstoð, verður takmarkaður."