Mjólkurfyrirtækin leiða neytendur á villigötur

Elín Hirst þingmaður Sjálfstæðisflokksins lýsti áhyggjum á Alþingi í dag af því magni sykurs sem settur væri í ýmsar mjólkurvörur sem sérstaklega væri ætlað að höfða til barna. Hún teldi að Mjólkurfyrirtækin væru að leiða neytendur á villigötur.

„Mig langar að taka undir þá gagnrýni sem fram hefur komið á mjólkurfyrirtækin í landinu, sem framleiða mat sem sérstaklega höfðar til barna,“ sagði Elín í umræðum um störf þingsins.

Þar ætti hún sérstaklega við jógúrt ýmis konar og tengdar afurðir. Þessar vörur væru  í ákaflega flottum og sölulegum umbúðum.

„Sérstaklega hönnuðum fyrir börn. Til dæmis heitir ein þeirra hreint út sagt Skólajógúrt. En þegar maður bragðar á þessum matvörum eiga þær lítið skylt við þá súrmjólk eða það hreina skyr sem ég borðaði alla vega með bestu lyst sem krakki. En þá var reyndar boðið upp á lítið annað,“ sagði Elín.

Þótt ekki hafi allt verið hollt og gott í gamla daga, hefði hún áhyggjur af heilsu barna miðað við það sem þau nærðust á. Sykurmagnið í þessum vörum sem gjarnan væru tengdar við hollustu væri mjög mikið.

„Þarna tel ég að verið sé að leiða neytendur á villigötur og ég hef áhyggjur af börnunum okkar sérstaklega í þessu sambandi. Og ég bið íslensk fyrirtæki á sviði mjólkurafurða að hugsa sinn gang og venda sínu kvæði almennilega í kross og bjóða börnum jafnt sem fullorðnum upp á hollari og betri mat og burt með allan þennan sykur,“ sagði Elín Hirst þingmaður Sjálfstæðisflokksins.