Hafnar gagnrýni á vinnu hagræðingarhópsins

Vinna er hafin í hinum ýmsu ráðuneytum við nærri fjörutíu prósent þeirra tillagna sem hagræðingarhópur ríkisstjórnarinnar kynnti í gær. Þá höfðu fjölmargar tillögur verið lagðar fram áður. Þingmaður í hagræðingrhópnum hafnar því að vinna hefði þurft betur að útfærslu á tillögum hópsins.

Stjórnarliðar hafa flestir fagnað tillögum hagræðingahópsins á meðan formenn bæði Samfylkingarinnar og Vinstri grænna fannst minna til þeirra koma. Fátt nýtt kæmi þar fram og flest væri svo almennt orðað að erfitt væri að sjá hver raunverulega sparnaður væri. Dæmi um almennt orðalag í skýrslunni er til dæmis tillaga númer 25, en þar segir:

Bókhald og greiðsla reikninga í sendiráðum verði endurskoðuð.

Í tillögu 65 segir: Fyrirkomulag eignaumsýslu Seðlabankans verði endurskoðuð

79. Eftirlit í heilbrigðisþjónustu verði endurskoðað

Vigdís segir tillögurnar mjög skýrar.

"Og þarna er mikið, eins og ég kalla það, hugsað út fyrir kassann og litið til allra átta."

Annað sem stjórnarandstaðan gagnrýnir við skýrsluna er að fjölmargar tillögur hafa áður verið lagðar fram, flestar í tíð fyrri ríkisstjórnar. Sumum hefur reyndar verið unnið eftir í mörg ár eins og þá að leitast við að þjónusta ríkisins verði í auknu mæli færð út á land. Annað hefur beinlínis verið ákveðið fyrir töluverðu síðan eins og að Bankasýsla ríkisins verði lögð niður.

"Við höfnum ekki annarra manna tillögum þó þær séu ekki frá okkur komnar. Það er gamaldags pólitík og stundum kennd við vinstrimennsku."

"Þannig að þú hafnar þeirri gagnrýni að orðalagið sé of almennt og fátt nýtt komi fram í tillögunum?"

"Algjörlega hafna ég því," segir Vigdís.