Ólögleg gististarfsemi

Ónefndur aðili í ferðaþjónustunni á Vestfjörðum fullyrðir að í kringum hátíðir eins og Aldrei fór ég suður, gisti fólk út um allt, í heimahúsum og borgi fyrir það en slíkt er leyfisskyld starfsemi. Bæjarins besta hefur eftir Áslaugu S. Alfreðsdóttur, hótelstjóra Hótels Ísafjarðar, að þetta sé ekki vandamál sem hefur áhrif á rekstur hótelsins, það er þegar hótelið er fullt. "Það er aftur á móti aðalatriði að þeir sem stunda atvinnurekstur í landinu, sitji allir við sama borð," segir Áslaug.

Þetta vandamál er ekki bundið við Vestfirði. Lögreglan taldi sérstaka ástæðu til að vekja athygli á þessu atriði í nýlegri tilkynningu á Facebook-síðu sinni: "Vakin er athygli á því að íbúðareigendur sem hyggjast leigja íbúðir sínar í skammtímaleigu til ferðamanna þurfa að sækja um rekstrarleyfi samkvæmt lögum nr. 85/2007 um veitingastaði, gististaði og skemmtanahald."