Kom við á Íslandi á leið sinni í kringum hnöttinn

Ástralskur maður, sem stefnir að því að verða yngsti flugmaður sögunnar til að fljúga hringinn í kringum hnöttinn einsamall, kom til Íslands um helgina. Flugmaðurinn heitir Ryan Campbell og er nítján ára. Hann lagði af stað 30. júní síðastliðinn og stefnir á að klára leiðangurinn 7. september.

Í viðtali við vefsíðuna Illawarramercury.com segist ungi ofurhuginn vera hæstánægður með komuna til Íslands, en lending hans hér á landi markaði miðbik ferðar hans um heiminn.  „Ég er mjög feginn að vera kominn hálfa leið,“ sagði Campbell, sem flaug 1334 sjómílna leið yfir Norður - Atlantshafið frá Kanada til Reykjavíkur. Ferðin tók hann níu klukkutíma.

Campbell naut dvalarinnar á Íslandi og sagðist hafa gengið um miðbæ Reykjavíkur á laugardaginn. Þá furðaði hann sig á því að hér væri enn dagsbirta klukkan tíu um kvöld. Hann lagði svo aftur í hann í gær, en næsti áfangastaður er Skotland. Campell segist drepa tímann um borð í vélinni með iPad spjaldtölvu og GoPro myndavél.

Campbell stefnir að því að slá met bandaríkjamannsins Jack Wiegand, en hann flaug hringinn einsamall þegar hann var 21 árs.