Ferðamenn sólgnir í tappað vatn en treysta sér ekki í lækinn

Ferðamenn eru sólgnir í íslenskt vatn og keppast drykkjarframleiðendur nú við að halda í við eftirspurnina. Kaupmaður í Vík á Mýrdal furðar sig á þorsta ferðamannanna en hann selur þeim rúmt tonn af vatni vikulega, þó svo að hann bendi þeim á sama vatn megi finna í læknum.

Viss sprenging hefur orðið í þeim fjölda ferðamanna sem sækja Ísland heim á síðustu árum. Árið 2011 voru þeir rúmlega fimm hundruð og sextíu þúsund en gert er ráð fyrir að þeir verði í kringum átta hundruð þúsund á þessu ári.

Eitthvað verða þessir ferðamenn að drekka. Ólíkt því sem gengur og gerist hér á landi er kranavatnið ekki jafn girnilegt víðast hvar annars staðar. Því freista drykkjarframleiðendur þess að klófesta ferðamenn við komu til landsins og færa þeim íslenskt vatn, tappað og merkt.

Nú má nálgast íslenskt vatn undir merkjum Pure Icelandic, framleitt af Vífilfell, Iceland Spring frá Ölgerðinni og Icelandic Glacial. Tvö síðarnefndu leggja mikla áherslu á útflutning á meðan Vífilfell hefur eignað sér markaðinn hér á landi.

Þannig hefur sumarsalan á Pure Icelandic tvöfaldast frá árinu 2010 hefur Vífilfell nú selt rúmlega tvö hundruð þúsund lítra af íslensku á síðustu 12 mánuðum.

„Við sáum svolítinn topp árið 2007 en þetta hefur rokið upp síðustu þrjú árin. Heildaraukningin er gríðarleg. Það á bæði við um matvöruverslanir, fríhöfnina og  bensínstöðvar. Þetta er bara íslenska vatnið," segir Rannveig Hrönn Brink, markaðsstjóri Pure Icelandic.

En hvað sem tölunum líður þá eru kaupmaðurinn sem finnur mest fyrir aukningunni. Pálmi Kristjánsson, verslunarstjóri Kjarvals í Vík í mýrdal, selur ferðamönnum rúmt tonn af vatni vikulega.

„Það er gríðarlega mikil sala. Þeir treysta manni ekki þegar maður segir þeim að drekka úr ánni. Maður drekkur nú sjálfur úr krana heima, þannig að þetta er ansi óvanalegt en kannski venjulegt fyrir útlendinginn“