Kristen með Robert á heilanum

Twilight-leikkonan Kristen Stewart er að sögn slúðurmiðlanna vestanhafs með fyrrverandi kærasta sinn, Robert Pattinson, á heilanum.

Hún sendir honum stöðug skilaboð og hefur meira að segja hringt í nýju kærustu leikarans, Riley Keough. Heimildarmennirnir segja það þó ekki staðfest að Pattinson og Keough séu par, en stúlkan er afabarn Elvis Preysley.

Stewart og Pattinson hættu saman í annað skiptið í maí, þegar leikarinn komst að því að hún hafði haft samband við leikstjórann Rupert Sanders, en Stewart og Sanders áttu í ástarsambandi við tökur myndarinnar „Snow White And The Huntsman“.

„Kristen er brjáluð og er búin að senda Robert SMS og hefur reynt að hringja í Riley til að komast að því hvað eigi sér stað, en enginn hefur svarað henni,“ sagði heimildarmaður við tímaritið Grazia.