Meirihluti óöruggur í miðbæ Reykjavíkur

Í könnun lögreglunnar á höfuðborgarsvæðinu á viðhorfum til lögreglunnar, ótta við afbrot og reynslu af þeim, kemur fram að meirihluti höfuðborgarbúa telur sig vera óörugga eina á gangi í miðborg Reykjavíkur að næturlagi. Konur telja sig óöruggari í miðborginni heldur en karlar og hlutfall þeirra sem eru óöruggir eykst eftir því sem þeir búa fjær miðborginni. Yfirgnæfandi meirihluti svarenda taldi sig hins vegar örugga í eigin hverfi á gangi að næturlagi. Konur eru þó óöruggari en karlar og eru íbúar Breiðholts óöruggari í samanburði við íbúa annarra svæða. Afbrot eru þó ekki tíðari í Breiðholtinu en annars staðar.

Tæplega sextíu prósent svarenda telja sig vera mjög eða frekar óörugga eina á gangi í miðborg Reykjavíkur eftir að myrkur er skollið á eða eftir miðnætti um helgar. Einungis sex prósent svarenda töldu sig mjög örugga eina á gangi á þessu svæði. Þessar niðurstöður eru svipaðar og niðurstöður fyrri ára. Karlar telja sig öruggari en konur eftir miðnætti um helgar í miðborginni. Þá er ungt fólk á aldrinum 18 til 35 ára mun líklegra en aðrir til að finna til öryggis við þessar aðstæður.

Eftir því sem fólk býr lengra frá miðborginni, verður það óöruggara þar að næturlagi. Ríflega sextíu prósent íbúa í Mosfellsbæ og Kjalarnesi telja sig óörugga, en eingöngu þrjátíu prósent miðborgarbúa.

Hins vegar telur mikill meirihluti þátttakenda sig vera örugga einir á gangi að næturlagi í sínu eigin hverfi. Líkt og í miðborginni eru karlar líklegri til að finna fyrir öryggi einir á gangi í sínu hverfi í samanburði við konur.

Þá telja íbúar Breiðholts sig óöruggari í eigin hverfi samanburði við íbúa annarra svæða. Í afbrotatölfræði lögreglunnar á höfuðborgarsvæðinu fyrir árið 2013 má þó sjá að afbrot eru ekki algengari í Breiðholti heldur en á öðrum svæðum borgarinnar, miðað við íbúafjölda.

Könnunin, sem framkvæmd hefur verið árlega síðan 2007 af Félagsvísindastofnun Háskóla Íslands, tók til tvö þúsund manns á höfuðborgarsvæðinu á tímabilinu 14. maí til 23. júní, og var svarhlutfall 64 prósent.

Þetta er í fyrsta sinn sem könnunin fór eingöngu fram rafrænt á internetinu og er talið að það hafi haft áhrif á niðurstöður hennar. Til dæmis hefur þeim fjölgað sem segjast hafa orðið fyrir kynferðisbroti eftir að farið var að leggja fyrir netkönnun, en slík svör komu sjaldan fram þegar könnunin var lögð fyrir í gegnum síma, segir í niðurstöðum Félagsvísindastofnunar. Í könnuninni nú sögðust 18 svarendur hafa orðið fyrir kynferðisbroti árið 2012, eða eitt prósent svarenda.