Erlendir nemendur fá nám ókeypis í fjárvana háskóla

Nemendur með erlent ríkisfang sem stunda nám við Háskóla Íslands greiða ekki skólagjöld frekar en Íslendingar heldur eingöngu skráningargjald. Engu máli skiptir hvort nemandinn kemur frá landi innan EES eða ekki.

„Það var heimild í lögunum um að innheimta gjöld fyrir nemendur utan EES en hún var felld út árið 2012,“ segir Friðrika Harðardóttir, forstöðumaður Skrifstofu alþjóðasamskipta við Háskóla Íslands. „Reyndar var þessi heimild aldrei notuð og erlendir nemendur hafa aldrei verið rukkaðir um skólagjöld.“

Erlendum nemendum við Háskóla Íslands fjölgar jafnt og þétt. 1.152 erlendir nemendur stunda nú nám við HÍ, tæplega þrjú hundruð fleiri en í fyrra. Kennslufjárveiting frá ríkinu til HÍ vegna erlendra nema árið 2013 er um fimm hundruð milljónir króna. Á sama tíma hafa fjárveitingar til háskólans lækkað um rúm 16 prósent.

„Það hefur verið skorið niður til háskóla eftir kreppu og á sama tíma eykst nemendafjöldinn. Það er mikil umræða um þetta til dæmis í Danmörku. Danskir háskólar taka á móti fjölmörgum erlendum nemum sem stunda dýrt nám frítt en flytja svo aftur í heimalandið að námi loknu og nýta menntunina þar. Þeir hafa rætt ýmsar takmarkanir og jafnvel að taka upp skólagjöld.“

Friðrika segir þó jákvætt fyrir háskólann að erlendir nemendur hafi áhuga á að stunda þar nám.



„Við fáum góða og sterka nemendur sem auðga háskólann okkar. Gott orðspor háskólans fer víða, námsframboð á ensku hefur aukist og svo er Ísland svolítið í tísku.“

Guðmundur R. Jónsson, framkvæmdastjóri fjármála og reksturs HÍ, segir að þótt erlendir nemendur kosti íslenska ríkið fimm hundruð milljónir á ári megi ekki gleyma hversu margir Íslendingar stunda nám erlendis.

„Íslendingar sleppa ótrúlega vel, maður næstum því skammast sín fyrir það. Norðurlöndin gera uppgjör á hverju ári þar sem greiddar eru um 870 þúsund krónur með hverjum nemanda sem lærir í öðru landi. Ísland er undanþegið þessu kostnaðaruppgjöri, eins og Færeyjar og Grænland, og sparar það íslenska ríkinu um 800 til 1.000 milljónir króna á ári.“