Skólastjóri á eftirlaunum vinnur sjálfboðastarf á leikskóla

„Það eru endalausir nýir fletir til að upplifa og sjá,“ segir Gunnar Þór Jónsson sem starfar sem sjálfboðaliði á leikskólanum Tjarnarseli í Reykjanesbæ. Hann fór á eftirlaun síðasta vor eftir fjörutíu ára starf sem kennari og skólastjóri, nú síðast sem skólastjóri Heiðarskóla í Reykjanesbæ.

„Þetta á sér langan aðdraganda. Konan mín hefur verið leikskólastjóri á Tjarnarseli í 18 ár. Þetta var einn af fyrstu leikskólunum sem fór markvisst í lestrar- og skriftarkennslu og ég hef fylgst með starfi þeirra lengi, bæði hjá konunni og svo barnabörnunum sem hafa komið nánast læs upp úr leikskólanum.“

Gunnar langaði að sjá hvernig unnið er með lestur, skrift og íslenskukennslu í leikskólanum og hjálpar til með lestrarkennslu fyrir elstu börn leikskólans fyrir hádegi alla virka daga.

„Það er frábært að fylgjast með þeim og fá að taka þátt af fullum krafti. Svo get ég líka kannski lagt eitthvað til málanna. Það er líka alltaf gaman að vinna með börnum og fá að kenna þeim. Mín reynsla og áhugi liggur fyrst og fremst á sviði skólamála,“ segir Gunnar.

Hann segir lítið mál fyrir þau hjónin að starfa saman. „Við höfum unnið mikið saman í gegnum tíðina en ég veit svo sem ekki hvernig það er fyrir hitt starfsfólkið að kallinn sé kominn í starfsmannahópinn.“

Gunnar þvertekur fyrir að hann hafi tekið að sér starfið af því að honum leiddist eftir að hann fór á eftirlaun. „Alls ekki. En mig hefur lengi langað til að taka þátt í verkefninu og loksins fékk ég tíma fyrir það.“

Ragnhildur Sigurðardóttir, aðstoðarleikstjóri Tjarnarsels, hefur stýrt lestrarkennslunni í leikskólanum og fagnar framlagi Gunnars. „Það er alveg yndislegt að fá hann hérna inn. Hann kennir okkur nýjar leiðir og hann kynnist leiðum leikskólans. Svo finnst börnunum óskaplega gaman að hafa hann með,“ segir Ragnhildur.

Tjarnarsel hefur í tíu ár lagt áherslu á lestrarnám. Markmiðið er að styrkja sjálfstraust barnanna og sporna við sérkennslu í grunnskólum. Það er gert með því að kynna börnin fyrir lestri í gegnum leik og vekja forvitni þeirra.