Mæðrastyrksnefnd fær margfalt meira

Ríkið hefur styrkt bæði Fjölskylduhjálp Íslands og Mæðrastyrksnefnd á undanförnum árum, en tugum milljóna munar á framlögunum. Samkvæmt gögnum sem Fréttablaðið hefur undir höndum frá Fjársýslu ríkisins hefur Fjölskylduhjálp Íslands fengið 16.991.500 krónur frá árinu 2004 til 2012, mest 5.053.000 krónur árið 2011. Mæðrastyrksnefnd hefur á sama tímabili fengið 51.795.000 krónur, mest 9.100.000 krónur árið 2011.

Ragnhildur G. Guðmundsdóttir, formaður Mæðrastyrksnefndar Reykjavíkur, segir hana ekki sambærilega Fjölskylduhjálp Íslands. „Fjölskylduhjálpin er stofnuð árið 2003 en við erum orðnar 85 ára. Þessum samanburði má ekki gleyma. Við erum búnar að standa vaktina allan þennan tíma og allt í sjálfboðavinnu. Í hverri viku vinna 15 til 20 konur hjá okkur kauplaust.“

Hún segir mest allt sem nefndin fær frá hinu opinbera fara í reksturinn. „Við borgum fasteignagjöld til Reykjavíkurborgar, sem styrkir okkur ekki, hita og ljós, síma, viðgerðir og akstur. Við pöntum heilmikið af mat og honum þarf að koma til okkar.“ Einnig segir Ragnhildur Mæðrastyrksnefnd og Fjölskylduhjálp reknar á mismunandi grunni. „Fjölskylduhjálpin er einkafyrirtæki og við erum samstarfsverkefni sjö kvenfélaga.“

„Við úthlutuðum 30.000 matargjöfum síðustu tólf mánuði og teljum að við séum án nokkurs vafa stærst þeirra hjálparsamtaka á Íslandi sem standa að aðstoð við fátækt fólk hér á landi. Þetta vita ráðamenn, bæði ríkisstjórn og sveitarfélög,“ segir Ásgerður J. Flosadóttir, formaður Fjölskylduhjálpar Íslands.

„Við höfum alltaf talið að það ríkti einhvers konar jafnræði um framlag ríkis og sveitarfélaga til hjálparsamtaka á Íslandi. Það vakti því furðu okkar hjá Fjölskylduhjálp og þeim 50 sjálfboðaliðum sem þar starfa, þegar í ljós kom að mismunur er á milli hjálparsamtaka upp á tugi milljóna,“ segir Ásgerður.

Hún segist þó fagna hverri krónu sem berist góðum málefnum, sama hvaða leið hún fer. „Öll hjálparsamtök eru fjárvana og fögnum við hverri krónu sem fer í gott málefni hvort sem hún kemur í gegnum Fjölskylduhjálp Íslands eða önnur hjálparsamtök. Við eigum erfitt með að sinna okkar starfi og erum því dugleg að finna leiðir til að fjármagna starfsemi okkar sjálf.“