Kvörtunum hefur ekki fjölgað frá hruni

Tæplega 500 kvartanir og skyld erindi bárust Landlækni frá 1. janúar 2011 til 8. október síðastliðins. Á árunum 2011 og 2012 barst Landlækni alls 351 erindi vegna heilbrigðisþjónustu. Af þessum málum voru formlegar kvartanir samtals 74 og liggur niðurstaða fyrir í 54 þeirra, að því er kemur fram á vef embættisins.

Þar segir að það sé mat embættisins að í 17 af þessum 54 formlegu kvörtunum hafi orðið mistök, vanræksla og/eða að framkoma heilbrigðisstarfsmanna hafi verið ótilhlýðileg.

Í kjölfarið hefst svokallað eftirlitsmál, að sögn Önnu Bjargar Aradóttur, sviðsstjóra eftirlits og gæða hjá Landlækni. „Það hefur ekki verið tekin ákvörðun um birtingu á tölfræði eftirlitsúrræða sem geta verið tilmæli, áminning eða svipting,“ segir hún.

Auk formlegra kvartana vörðuðu erindin samskipti við veitendur heilbrigðisþjónustu, aðgang að sjúkraskrá og óvænt atvik auk þess sem gerðar voru athugasemdir við heilbrigðisþjónustu. Þar að auki voru nokkur óskilgreind erindi.

Fyrirliggjandi gögn benda til að helmingur formlegra kvartana sé afgreiddur innan eins árs og 75 prósent innan 15 mánaða. Þess er jafnframt getið að tekin hafi verið upp önnur og ítarlegri flokkun erindanna sem berast en áður tíðkaðist.

„Ef skoðað er aftur til ársins 2008 virðast sveiflurnar vera eðlilegar milli ára. Ekki er hægt að sjá fjölgun,“ segir Anna Björg.