Norðmenn stokka upp landbúnaðarkerfið

Lagðar eru til gagngerar breytingar á landbúnaðarkerfi Norðmanna í nýjum stjórnarsáttmála Hægriflokksins og Framfaraflokksins.

Meðal þess sem lagt er til í sáttmálanum er lækkun tolla og aukin samkeppni, afnám framleiðsluskerðinga og kvótasetningar sem hindri landnýtingu og framþróun í geiranum.

„Stjórnin vill efla landbúnaðinn með því að einfalda lög, reglur og stuðning,“ segir í sáttmálanum.

Um leið er tekið fram að breytingunum skuli smám saman komið á Þá skuli tengja stuðning við landbúnað í auknum mæli við framleiðslu, fremur en landrými, innan þess ramma sem alþjóðleg reglusetning heimili.

„Landbúnaðurinn á að reiða sig minna á opinberan stuðning, draga á úr kostnaði í gerianum og opna bændum ný tækifæri til að afla tekna.“ Sérstaklega sé horft til þess að einfalda kerfið og draga úr skrifræði tengdu landbúnaði.

Jón Gunnarsson, þingmaður Sjálfstæðisflokks og formaður atvinnuveganefndar, segir ekki loku fyrir það skotið að ráðist verði í viðlíka breytingar á íslensku landbúnaðarkerfi.

„Við erum auðvitað með samning sem er í gildi við Bændasamtökin, en framtíðarsýn okkar hlýtur að liggja í því að skoða með bændum alla möguleika á því með hvaða hætti við náum að efla íslenskan landbúnað.,“ segir Jón.

Hann segir aukin tækifæri hafa komið upp í hefðbundnum landbúnaði hér, svo sem í tengslum við útflutning landbúnaðarvara. 

„Og með þeim breytingum og þróun sem er að eiga sér stað hljótum við að reyna, með íslenskum landbúnaði eða þeim sem að þar starfa, að efla hann og gera hann sjálfbærari í framtíðinni. Á því held ég að sé í raun gagnkvæmur áhugi meðal bænda og stjórnvalda.“ 

Í nýrri skýrslu Efnahags- og framfarastofnunarinnar (OECD) um landbúnaðarstefnu ríkja stofnunarinnar segir að þróunin hafi síðustu ár og áratugi verið í átt minni stuðnings í landbúnaði. Ljóst sé að tollamúrar og markaðshömlur einangri framleiðendur á heimamörkuðum og neytendur frá heimsmarkaði. 

Þröng sýn á sjálfbærni iðnaðarins innan hvers lands hafi í för með sér mikinn efnahags- og samfélagslegan kostnað.