Reykvíkingar snyrti gróður við lóðamörk

Dæmi eru um að trjágróður sem vex út á göngustíga hafi valdið því að ekki hafi verið hægt að ryðja snjó af stígum Reykjavíkurborgar. Gróðurinn getur valdið hættu og hafa snjóruðningstæki skemmst við að ryðja stíga í borginni.

Við eftirlit með stígum borgarinnar í síðasta mánuði fundu starfsmenn borgarinnar um 1.500 staði þar sem líklegt er að gróður hindri för snjóruðningstækja.

Í tilkynningu frá Reykjavíkurborg eru borgarbúar hvattir til að snyrta gróður við lóðamörk sín. Samkvæmt byggingareglugerð má gróður ná út fyrir lóðarmörk, en aðeins í yfir 2,8 metra hæð yfir göngustígum, og 4,2 metra hæð yfir akbrautum.