Flugvirkjunum vísað frá Sádi-Arabíu

Flugvirkjunum þremur sem voru handteknir í Sádi-Arabíu í september grunaðir um ölvun hefur verið vísað úr landi.

Áfengislög í Sádi-Arabíu eru mjög ströng en brot á þeim varðar fangelsisvist, háa fjársekt og/eða opinbera hýðingu.

Stefán Eyjólfsson, starfsmannastjóri Atlanta-flugfélagsins sem flugvirkjarnir starfa hjá, segir málið hafa farið á besta veg. „Þeir voru á hóteli og störfuðu hjá fyrirtækinu á meðan þeir biðu niðurstöðu, sem er að þeim er vísað úr landi og þeir mega aldrei koma aftur til Sádi-Arabíu.“

Mennirnir geta því ekki starfað áfram í landinu og enn er óljóst hvað verður um starfsferil þeirra. „Það er í vinnslu á milli Atlanta og þeirra hvernig mál þeirra verður afgreitt,“ segir Stefán.

Mennirnir þrír, sem allir eru á fertugsaldri, voru handteknir við komuna til Sádi-Arabíu grunaðir um neyslu áfengis um borð í flugvélinni. Þeir dvöldu á hóteli í Ríad á meðan málið var í rannsókn. Mennirnir neituðu alfarið sök.