40 konur í húsi Bernhörðu Alba

Leikhópur Húss Bernhörðu Alba færði sig í gærmorgun um set því að þrátt fyrir að Borgarleikhúsið setji sýninguna upp verður hún sýnd í Gamla bíói.

„Þetta er sögufrægt hús og ótrúlega fallegt,“ segir Maríanna Clara Lúthersdóttir en hún fer með eitt hlutverkanna í sýningunni. „Það er rosalega góður hljómburður þarna og ég hef aldrei leikið þarna áður,“ útskýrir hún. Um 40 konur taka þátt í sýningunni, þar af 20 söngkonur úr kórnum Vox feminae.

Æfingar fóru í fyrsta sinn fram í leikmynd í gær en það er Birna Björnsdóttir sem að stendur á bakvið hana. „Það er svo dásamlegt að fá að æfa verkið í leikmynd," segir Maríanna og bætir því við að leikmyndin í verkinu sé ekki af verri endanum.

Ástæðan fyrir því að verkið er flutt í Gamla bíó er plássleysi en Stóra sviðið er nú upptekið vegna sýninga á Mary Poppins og Músum og mönnum.

Hús Bernhörðu Alba verður frumsýnt 18. október.