Nýjum metanbílum fækkar um helming

Nýskráningar metanbíla drógust saman um 58 prósent á fyrstu átta mánuðum ársins samanborið við sama tíma árið 2012. Bifreiðum sem var breytt í metanbíla fækkaði einnig um 76 prósent milli ára. Þetta kemur fram í tölum frá Samgöngustofu.

Stefán Ásgrímsson, ritstjóri hjá Félagi íslenskra bifreiðaeigenda, segir ástæðuna mega að miklu leyti rekja til breytinga á vörugjöldum bifreiða. Árið 2011 var gjöldum breytt þannig að þau miðuðu ekki lengur við stærð bílvéla heldur mengun í útblæstri. „Áður voru metanbílar án vörugjalda vegna þess að gjaldið fór eftir stærð vélarinnar og þessir bílar voru undir settu viðmiði þess tíma. Með breytingunum hefur það gerst að nú er um fleiri ökutæki að ræða sem eru undir nýja mengunarviðmiðinu, og því hafa metanbílar fengið aukna samkeppni,“ segir Stefán. Hann segir einnig að rafbílar sem kosta undir sex milljónum beri ekki vörugjöld og ekki þurfi að greiða af þeim virðisaukaskatt.

Sala á metangasi hefur fram að þessu fylgt þeirri miklu aukningu sem varð á fjölda metanbíla fram til 2012. Björn Halldórsson, framkvæmdastjóri Sorpu, sem er eini framleiðandi metangass í landinu, segir að sala hafi fjórfaldast milli áranna 2010 og 2012. Það sem af er ári hefur salan nokkurn veginn staðið í stað. „Þarna gæti verið komin skýring á því af hverju salan virðist hafa náð ákveðnu jafnvægi. Þessi þróun, að vörugjöldin verði til þess að eftirspurn minnki, er ekki góð því við getum framleitt meira af metani en okkar metanbílafloti þarf,“ segir Björn.

Hann segir einnig einkennilegt að miðað sé við útblástur bifreiða þegar komi að útreikningi vörugjalda. „Metanið sem við vinnum er unnið úr lífrænum úrgangi á urðunarstað og á sér allt annan uppruna en jarðefnaeldsneyti og eykur þess vegna ekki magn koltvísýrings í andrúmslofti,“ segir Björn.