Enn þrír karlar í Íslandsdeild Evrópuráðsþingsins

„Það er ekki enn búið að finna lausn á því hvernig eigi að fækka körlum í Íslandsdeild Evrópuráðsþingsins,“ segir Einar K. Guðfinnsson forseti Alþingis.

Evrópuráðsþingið gerði í sumar alvarlegar athugasemdir við skipan nefndarinnar og sagði hana ekki samræmast reglum um kynjakvóta á Evrópuráðsþinginu. Í nefndinni sitja Karl Garðarsson fyrir Framsóknarflokkinn, Brynjar Níelsson Sjálfstæðisflokki og Ögmundur Jónasson Vinstri grænum.

Verulegur kynjahalli er í sumum nefndum Alþingis, má þar nefna velferðarnefnd en í henni sitja sjö konur og einn karl. Í efnahags- og viðskiptanefnd sitja hins vegar sjö karlar og tvær konur. Einar segir að ekki hafi komið fram neinar hugmyndir um að jafna kynjahlutföll í öðrum nefndum Alþingis.