Aðgangseyrir að Geysi í lýsingu að hugmyndasamkeppni landeigenda

Í hugmyndasamkeppni að skipulagi Geysissvæðisins er gert ráð fyrir þeim möguleika að tekinn verði aðgangseyrir. Opna á aðgang að sem flestum hverum, minjum og öðru áhugaverðu með sem minnstu raski. Dómnefnd skilar af sér í mars.

Efnt hefur verið til hugmyndasamkeppni um skipulag og hönnun Geysissvæðisins í Haukadal.

„Kallað er eftir heildarlausn sem í senn verndar viðkvæma náttúru hverasvæðisins, endurspeglar sérstöðu staðarins, undirstrikar umhverfið og kallar fram tækifæri til jákvæðrar upplifunar fyrir gesti,“ segir í keppnislýsingu landeigendanna, sem eru ríkið og fjölmargir einstaklingar.

Fram kom í fréttum Stöðvar 2 um miðjan júlí að tafir urðu á útgáfu keppnislýsingar vegna þess að fjármálaráðuneytið var ósátt við að kveðið væri á um að taka ætti mið af gjaldtöku inn á svæðið.

„Keppendur taki í tillögum sínum mið af mögulegri gjaldtöku í framtíðinni og nauðsynlegri aðgangsstýringu. Útfærsla á gjaldtöku liggur ekki fyrir,“ er lendingin í samkeppnislýsingunni.

Verkefnið er sagt taka „til hönnunar á heildarskipulagi á svæðinu sjálfu, hugmynda að tengslum við nánasta umhverfi þess og hönnun á nánasta umhverfi þess og hönnun á nauðsynlegum mannvirkjum eins og stígum, útsýnispöllum, bekkjum, skiltum og svo framvegis“.

Mælst er fyrir um að leitast skuli við að opna aðgang að sem flestum hverum, minjum og öðru áhugaverðu á svæðinu og draga fram sérstöðu þeirra með sem minnstu raski.

Talið er að hálf milljón manna hafi heimsótt Geysi á árinu 2012. Mikill meirihluti erlendra ferðamanna er sagður koma þangað. Svæðið þarf að þola mikla álagstoppa í umferð því fjöldi gesta getur verið allt að sex þúsund manns á sólarhring.

„Uppbygging og viðhald á sjálfu hverasvæðinu hefur ekki haldist í hendur við þann mikla vöxt sem orðið hefur á fjölda erlendra ferðamanna. Þolmörkum svæðisins er náð, þar eð heildarfjöldi ferðamanna á svæðinu er orðinn það mikill að sýnileg hnignun er að eiga sér stað á svæðinu,“ segir í keppnislýsingunni. Stígakerfið anni ekki þeim fjölda sem heimsæki Geysi:

„Mikilvægt er að þátttakendur samkeppninnar skoði núverandi stígakerfi með það fyrir augum að hanna lengra stígakerfi sem hefur þann eiginleika að dreifa álagi um svæðið. Einnig er nauðsynlegt að afmarka það svæði sem er hvað viðkvæmast svo að það verði ekki troðið niður og eyðilagt.“