Fá iPhone til Íslands eftir krókaleiðum

Enginn þeirra sem selur iPhone-síma frá Apple hér á landi kaupir símana beint frá Apple, heldur í gegnum milliliði, annaðhvort hér eða erlendis. Nova, Síminn og Epli.is hófu í gær sölu á nýju iPhone-símunum, 5c og 5s.

Apple er ekki með formlegt umboð hér á landi fyrir iPhone. Þó er Epli.is með umboð fyrir tölvur og iPad, og þjónustuumboð fyrir aðrar vörur.

„Markaðurinn hér á landi hefur bara þótt of lítill hingað til,“ segir Bjarni Ákason, framkvæmdastjóri Epli.is, sem hefur þurft að nálgast tæki á svipaðan hátt og aðrir íslenskir söluaðilar. Bjarni bætir þó við aðspurður að yfir 40.000 iPhone-símar séu í notkun hér á landi.

Samkvæmt heimildum Fréttablaðsins hafa íslenskar verslanir því reitt sig á aðila sem kaupa síma erlendis, jafnvel yfir afgreiðsluborðið í smásöluverslunum.

Mögulegt er að breyting verði þar á á næstunni þar sem heimildir Fréttablaðsins herma að einhver símafyrirtækjanna hér á landi hafi verið í þreifingum við Apple um að kaupa inn beint frá fyrirtækinu og mögulega muni draga til tíðinda í þeim málum á næstunni.

„Mig grunar að eitthvað fari að gerast í þeim málum,“ segir Bjarni.

Liv Bergþórsdóttir, framkvæmdastjóri Nova, segir í samtali við Fréttablaðið að fyrirtækið sé með sína birgja í þessum málum. Þetta sé hefðbundin aðferð og símafyrirtæki selji oft búnað til annarra.

Hrannar Pétursson, framkvæmdastjóri samskiptasviðs Vodafone, segir þess stutt að bíða að nýju iPhone-símarnir komi í sölu hjá þeim.

„Þetta er dagaspursmál,“ segir hann og bætir við aðspurður að hingað til hafi Vodafone keypt sína síma bæði af aðilum hérlendis og erlendis. „Við látum það bæði ráðast af verði og framboði á hverjum tíma.“

Hrannar segir aðspurður um hvort ekki mætti vænta lægra útsöluverðs hér á landi ef hægt væri að kaupa beint frá Apple og sleppa þannig við milliliðinn að svo þurfi ekki að vera. „Það er ekkert sjálfgefið að innkaupsverð til okkar myndi lækka við það að kaupa beint frá Apple.“