Skýrsluskilin aldrei tímasett

Skilin á skýrslu rannsóknarnefndar Alþingis um sparisjóðina hafa aldrei verið tímasett og því er villandi að tala um að þeim hafi verið frestað á fundi með forsætisnefnd Alþingis í þarsíðustu viku. Þetta segir Hrannar Már S. Hafberg, formaður nefndarinnar.

Á fundinum kom fram að nefndin hygðist skila skýrslu sinni í kringum mánaðamótin nóvember-desember. Í frétt Fréttablaðsins af málinu í síðustu viku kom fram að skilunum hefði ítrekað verið frestað, og bent á að upphaflega hafi nefndinni verið markaðir níu mánuðir til verksins. Í nóvemberlok muni hún hins vegar hafa starfað í 27 mánuði.

Hrannar áréttar það sem fram kom hjá þingforsetanum Einari K. Guðfinnssyni að verkefnið hafi undið mjög upp á sig og reynst mun viðameira en að var stefnt í upphafi. Þá hafði það einnig áhrif að skipt var um formann í nefndinni í miðju kafi fyrir réttu ári.

Hrannar segir rannsóknarvinnuna sjálfa meira og minna búna og því hafi nefndin treyst sér til að segja nokkurn veginn til um hvenær skýrsluskrifum gæti lokið.