Óttast skattahækkanir á lágtekjufólk

„Við óttumst að skattar verði hækkaðir á fólk með lágar og miðlungstekjur. Forystumenn í ríkisstjórn hafa boðað að það eigi að fara í skattkerfisbreytingar, það eigi að fækka skattþrepum úr þremur niður í eitt. Við teljum að það leiði til þess að skattar verði hækkaðir á okkar fólk. Þannig var það og þannig verður það aftur,“ segir Sigurður Bessason, formaður Eflingar.

Í sama streng tekur Aðalsteinn Baldursson, formaður Verkalýðsfélags Húsavíkur. „Ríkisstjórnin ákvað að afnema auðlegðarskatt, hætta við aukna skattlagningu á ferðaþjónustuna og lækkaði veiðigjöld á útgerðina.Einhvers staðar verða stjórnvöld að afla tekna og við erum hræddir um að þau leggi auknar álögur á lágtekju- og millitekjufólk til að reyna að reyna að stoppa upp í gatið,“ segir Aðalsteinn. 

Kjarasamningar eru lausir 30. nóvember og menn reikna með að aðilar vinnumarkaðarins setjist að samningaborðinu fljótlega eftir að búið verður að leggja fjárlagafrumvarpið fram. Þeir sem rætt hefur verið við innan verkalýðshreyfingarinnar segja allir að samið verði til skamms tíma, sex til tíu mánaða.

„Það er ekki hægt að semja í því tómarúmi sem nú er,“ segir Sigurður. Hann segir að ríkisstjórnin eigi eftir að móta efnahagsstefnu til lengri tíma og menn hafi ekki hugmynd um hvað stjórnvöld ætlist fyrir. Á meðan sé tómt mál að tala um að gera samninga til lengri tíma. 

Stéttarfélög í opinbera geiranum eru sammála því að ekki verði hægt að semja til langs tíma vegna óvissu í efnahagsmálum. Þar óttast menn líka uppsagnir hjá ríki og sveitarfélögum vegna fyrirhugaðrar hagræðingar. Það verði því að leggja áherslu á að verja störf hjá hinu opinbera í komandi kjaraviðræðum. „Menn eru ekki að fara semja til þriggja ára við slíkar aðstæður,“ segir Árni Stefán Árnason, formaður SFR.