Þjálfari óskast hjá ÍA

Þórður Þórðarson lét af störfum sem þjálfari knattspyrnuliðs ÍA í gær og óljóst er hver tekur við liðinu. Pétur Pétursson, aðstoðarþjálfari KR, hefur nú þegar hafnað starfinu. Stjórn ÍA ætlar að flýta sér hægt í leit að eftirmanni Þórðar.

„Þetta kom upp á borð til okkar á mánudagskvöldið,“ sagði Þórður Guðjónsson, framkvæmdastjóri ÍA, í samtali við Fréttablaðið í gær.

„Þórður [Þórðarson] vildi stíga til hliðar þar sem liðið er aðeins með þrjú stig eftir sjö leiki. Þórður [Þórðarson] er það mikill Skagamaður að hann taldi rétt að fá annan að verkinu eins og er. Það var hans mat að það væri betra fyrir liðið að fá annan mann í starfið.“

Fram undan er mikil fallbarátta hjá Skagamönnum en liðið mætir Keflavík, Víkingi Ó., Þór og Fylki í næstu fjórum umferðum Pepsi-deildar karla og því að duga eða drepast fyrir þá gulu. Skagamenn mæta Blikum annað kvöld í 16-liða úrslitum Borgunarbikarsins.

„Við erum að fara í eins konar úrslitakeppni í næstu leikjum og barátta um sæti okkar í deildinni fram undan.“

Þórði var ekki bolað út

„Það var samt sem áður mikil ánægja með störf Þórðar í stjórn knattspyrnudeildar ÍA. Liðið lék vel gegn KR í síðustu umferð og mikill viðsnúningur á spilamennsku ÍA. Það var engin pressa af hálfu félagsins að hann myndi láta af störfum, þetta var alfarið hans ákvörðun.“

„Við erum í raun ekki í vandræðum þegar kemur að þjálfurum á Akranesi en eins og staðan er í dag munu Dean Martin, aðstoðarþjálfari liðsins, og Jón Þór Hauksson afreksþjálfari stjórna liðinu á fimmtudaginn.“

Stjórn knattspyrnudeildar ÍA leitar nú að nýjum þjálfara til að taka við liðinu.

„Við erum að skoða í kringum okkur en ætlum að flýta okkur hægt. Hvort sem við finnum mann í stöðuna út tímabilið eða til langtíma þá verður það bara að koma í ljós en það er ekkert leyndarmál að við erum að leita okkur að þjálfara. Við settum í raun og veru saman lista í gærkvöldi og ætlum svo að vinna okkur út frá því, hlera menn og kanna þeirra stöðu.“

„Við höfum ekki hafið neinar formlegar viðræður en erum aftur á móti búnir að heyra í nokkrum varðandi starfið. Einn þeirra er Pétur Pétursson sem gaf ekki kost á sér í verkefnið.