KR-ingar verða að vinna í kvöld

Veikleika er ekki að sjá á KR-ingum í upphafi Íslandsmótsins, þeir eru með fullt hús, hafa skorað meira en tvö mörk að meðaltali í leik og haldið hreinu í þremur síðustu leikjum sínum.

Frá árinu 1977 hafa aðeins sjö lið verið með betri markatölu eftir fjóra leiki og það er margt sem bendir til þess að KR-liðið sé í meistaraham og hungrað eftir ófarirnar í fyrra.

Mótherjar kvöldsins eru Blikar sem hafa verið sveiflukenndir í fyrstu umferðunum en verða helst að fá eitthvað út úr leiknum í kvöld ætli Ólafur Kristjánsson og lærisveinar hans ekki að heltast úr lestinni í titilbaráttunni.

KR er með tveggja stiga forskot á FH og kannski finnst einhverjum það vera skrýtin fullyrðing að þeir verði að vinna leikinn á KR-velli í kvöld. Sagan segir hins vegar að KR verði að vinna sigur í kvöld eigi 26. titilinn að rata í Frostaskjólið.

KR er fjórtánda liðið sem vinnur fjóra fyrstu leiki sína frá því að liðin fóru að leika heima og heiman sumarið 1959. Þeir voru þeir fyrstu til að afreka slíkt sumarið 1959 en KR-liðið setti þá met sem aldrei verið slegið, aðeins jafnað þegar þeir unnu alla leiki sína á Íslandsmótinu. Síðan eru liðin 54 ár og nú voru KR-ingar sjálfir fyrst að endurtaka leikinn, það er vinna fyrstu fjóra leiki sína.

Mikilvægi fimmta leiksins fer ekki framhjá neinum sem skoðar tölfræði Íslandsmótsins á þessum 54 árum. Ekkert liðanna fimm sem hefur tapað stigum í fimmta leik eftir sigra í fjórum fyrstu leikjunum hefur orðið Íslandsmeistari um haustið.

Fjögur þeirra voru reyndar nálægt því, með því að vinna silfrið en nýjasti meðlimurinn í hópnum, ÍA-liðið frá því í fyrra, gaf mikið eftir þegar leið á sumarið.

Sex af átta liðum sem hafa verið með fullt hús eftir fimm leiki hafa aftur á móti orðið Íslandsmeistarar. Í öðru af þeim tveimur tilfellum sem það klikkaði unnu tvö lið fyrstu fimm leiki sína (FH og Valur 2005) en í hitt skiptið komu Keflvíkingar (1997) gríðarlega á óvart með því að vinna fyrstu sex leiki sína (spáð 7. sætinu) en náðu síðan aðeins í sex stig í síðustu tólf leikjum sínum.

KR-ingar koma því ekki mikið á óvart með því að berjast um titilinn og engu öðru liði hefur tekist að fylgja þeim eftir í upphafi móts. Þetta blasir því við Vesturbæingum svart á hvítu, þeir verða að vinna í kvöld.

(frá því að liðin fóru að spila heima og að heiman 1959)

Sigur í fimmta leik

FH 2006 - Íslandsmeistari

FH 2005 - Íslandsmeistari

Valur 2005 - 2. sæti

Keflavík 1997 - 6. sæti

ÍA 1995 - Íslandsmeistari

Valur 1978 - Íslandsmeistari

Keflavík 1973 - Íslandsmeistari

KR 1959 - Íslandsmeistari

Jafntefli eða tap í fimmta leik

ÍA 2012 - jafntefli - 6. sæti

Keflavík 2008 - tap - 2. sæti

FH 2007 - jafntefli - 2. sæti

Fram 1980 - jafntefli - 2. sæti

ÍA 1961 - tap - 2. sæti