Þrengt að hrefnuveiðimönnum

Steingrímur J. Sigfússon, atvinnuvegaráðherra, gaf í gær út reglugerð þess efnis að griðasvæði hvala í Faxaflóa stækkaði.

Reglugerðin tók gildi á miðnætti. „Þetta kemur flatt upp á okkur enda veiðitímabilið nýhafið. Nú er verið að útiloka okkar aðalmið og við þurfum því að endurmeta stöðuna frá grunni,“ segir Gunnar Bergmann Jónsson, talsmaður hrefnuveiðimanna, og bætir við að þetta þýði lengri veiðitúra sem valdi því að fjölga þurfi réttindamönnum um borð sem sé mjög dýrt.

Samkvæmt reglugerðinni nær griðasvæðið frá Garðskaga á Reykjanesi að Skógarnesi á Snæfellsnesi en náði áður frá Garðskaga og norður fyrir Akranes. Er breytingin rökstudd þannig að umfang og þjóðhagslegt mikilvægi hvalaskoðunar hafi aukist og mikilvægt sé að umgjörð greinarinnar sé ásættanleg.

Griðasvæðið var hins vegar ekki stækkað jafn mikið og nefnd um stefnumörkun í hvalveiðimálum lagði til. Rannveig Grétarsdóttir, formaður Hvalaskoðunarsamtaka Íslands, segir breytinguna skref í rétta átt en gangi þó ekki nægilega langt.

„Við viljum að svæðið nái frá því yst á Snæfellsnesi og að Eldey þar sem hvalaskoðun er að byrja á ný í Keflavík.“

Rannveig segir að hrefnuveiðar hafi verið stundaðar í grennd við gamla griðasvæðið og að breyting hafi orðið á hegðun hrefna á svæðinu. „Við sjáum færri dýr í hverri ferð og þau sem við sjáum eru styggari. Það gæti verið vegna veiðanna og þó við getum ekki slegið því föstu þá teljum við áhættuna einfaldlega vera of mikla,“ segir Rannveig.- mþl