Öll þrjú efstu liðin í spánni stóðust pressuna

Þrjú efstu liðin í árlegri spá þjálfara, fyrirliða og forráðamanna unnu öll leiki sína í 1. umferð Pepsi-deildar karla í ár. FH (spáð 1. sæti) vann Keflavík 2-1, KR (2. sæti) vann Stjörnuna 2-1 og Breiðablik (3. sæti) vann Þór 4-1.

Þetta er í fyrsta sinn í átta ár þar sem þeim þremur liðum sem er spáð bestu gengi, tekst að vinna fyrsta leikinn sinn í mótinu.

Það hefur ekki gerst síðan sumarið 2005 þegar FH, KR og Valur unnu öll leiki sína í 1. umferðinni. FH varð Íslandsmeistari þetta sumar eins og spáð var, Valsmenn fóru upp um eitt sæti og tóku silfrið en KR-ingar lækkuðu sig um fjögur sæti og enduðu í sjötta sæti.

Þetta er mikil breyting frá síðustu sumrum því 2010-2012 tókst aðeins einu liði af topp þrjú í spánni að vinna sinn leik og það lið, KR 2011, mætti einmitt öðru liði af topp þrjú (Breiðablik) í 1. umferðinni.