Litríkari toppbarátta

Boltinn byrjar að rúlla aftur á morgun í vinsælustu deildarkeppni landsins eftir 281 daga frí. Það eru liðnir sjö mánuðir síðan að FH-ingar tryggðu sér Íslandsmeistaratitilinn með þrettán stiga yfirburðum en að þessu sinni vonast knattspyrnuspekingar að fleiri félög blandi sér í baráttu svart-hvítu liðanna, KR og FH, á toppnum.

Fréttablaðið hefur undanfarna daga talið niður í mót með því að birta spá íþróttablaðamanna blaðsins og þar búumst við að deildin skiptist í fjóra hluta. FH, KR, Stjarnan og Breiðablik berjist um Íslandsmeistaratitilinn, Valur, Fylkir, Fram og ÍA eru líkleg til að sigla lygnan sjó um miðja töflu en það kemur hugsanlega í hlut ÍBV, Þór, Keflavíkur og Víkings úr Ólafsvík að berjast fyrir lífi sínu.

Það skemmtilega við fótboltann er að hann tekur lítið mark á spámennsku spekingana og á hverju ári koma fram lið sem skjóta öllum spám ref fyrir rass sem og önnur sem bregðast síðan öllum væntingum. Í fyrra voru það Blikar, Eyjamenn og Fylkismenn sem hækkuðu sig mest út frá árlegri spá fyrirliða, þjálfara og forráðamanna en Valur, Fram og Grindavík enduðu hinsvegar mun neðar en í spánni.

Sunnudagurinn verður dagur frumsýninga en þar munu Eyjamenn spila sinn fyrsta leik undir stjórn Hermanns Hreiðarssonar þegar þeir fá ÍA í heimsókn og Ólafsvíkur-Víkingar spila sinn fyrsta leik í efstu deild þegar Framarar skella sér vestur á Snæfellsnes. Þriðji leikur dagsins er síðan í Kópavoginum þar sem Blikar fá nýliða Þórs í heimsókn. Blikar enduðu mótið frábærlega í fyrra en hafa tapað fyrsta leik undanfarin þrjú sumur.

Íslandsmeistarar FH hefja titilvörnina á mánudagskvöldið þegar þeir taka á móti Keflavík og FH-ingar ætla sér eflaust að breyta út frá venjunni að tapa stigum í fyrstu umferð. FH hefur ekki unnið fyrsta leik síðan 2008.

Á mánudagskvöldið er einnig stórleikur KR og Stjörnunnar í Vesturbænum og leikur Fylkis og Vals í Árbænum. Á KR-vellinum munu þeir Brynjar Björn Gunnarsson (KR) og Veigar Páll Gunnarsson (Stjarnan) spila á ný í deildinni eftir langan tíma í atvinnumennsku í Evrópu.

Framundan ættu að vera tæpir fimm mánuðir af skemmtilegu og spennandi Íslandsmóti og vonandi ræðst það ekki fyrr en í lok september hvaða félag hreppir íslandsmeistarabikarinn 2013.