Erfitt fyrir neðrideildarliðin

Bikarúrslitahelgi HSÍ hefst í dag þegar undanúrslit karla fara fram í Laugardalshöllinni. Í fyrsta skipti fara undanúrslit og úrslit fram sömu helgina og allir leikir í Laugardalshöllinni. Úrslitaleikir yngri flokka fara líka fram þessa helgi.

Það eru karlarnir sem ríða á vaðið í dag og undanúrslit kvenna fara svo fram á morgun. Úrslitaleikirnir verða svo spilaðir á sunnudag.

Tvö 1. deildarlið eru í undanúrslitum í karlakeppninni, sem kemur nokkuð á óvart. Fréttablaðið fékk Ágúst Jóhannsson, þjálfara 1. deildarliðs Gróttu, til þess að spá í spilin fyrir leiki dagsins.

„Ég held að þetta verði ansi strembið fyrir 1. deildarliðin. Þó svo að 1. deild sé alltaf að styrkjast er enn stigsmunur á gæðunum þar og í efstu deild. Ég held að ÍR og Akureyri fari nokkuð þægilega í gegnum þetta," sagði Ágúst en hvað þarf að gerast til að 1. deildarliðin komi á óvart?

„Þau þurfa að eiga algjöran toppleik. Það þarf líka að vera vanmat hjá úrvalsdeildarliðunum en ég sé það ekki gerast þegar svona langt er liðið á keppnina. Ég hefði haft gaman af því að fá 1. deildarlið í úrslitin en ég sé það ekki gerast," sagði Ágúst, en hann stýrði Gróttu alla leið í úrslit á sínum tíma þegar liðið var í 1. deild. Er það í eina skiptið sem 1. deildarlið hefur komist í úrslit.

Ef spá þjálfarans gengur eftir verða það ÍR og Akureyri sem spila á sunnudaginn. Hvernig leggst sá leikur í hann?

„Ég held að það verði hörkuleikur. Akureyri er með ungt og efnilegt lið í bland við reynslumeiri menn eins og Bjarna og Heimi sem þjálfa líka liðið. ÍR er með gríðarlega sterkt varnarlið og mikil stemning í kringum félagið. Það er líka stemning í kringum Akureyringa og ég held að þetta verði flottur úrslitaleikur," segir Ágúst en hvort liðið vinnur leikinn?

„Ég hallast að sigri ÍR-inga en það verður ekki auðvelt. Varnarleikur ÍR-inga mun gera gæfumuninn."

Það er almenn jákvæðni í handboltahreyfingunni með þetta nýja fyrirkomulag á úrslitahelginni. Ágúst er á meðal þeirra jákvæðu.

„Mér líst mjög vel á þetta. Það er gaman að prófa þetta. Svona fyrirkomulag hefur heppnast mjög vel erlendis. Það er flott umgjörð í kringum keppnina og nú snýst þetta um hvernig félögin standa að sínum málum og hversu margt fólk mætir á svæðið. Þetta er flott framtak og til fyrirmyndar hvernig er staðið að þessu."

Örlög N1-deildarliðanna í bikarnum í vetur:

Haukar - duttu út á móti ÍR (8 liða úrslit)

FH - datt út á móti Akureyri (8 liða úrslit)

Fram - datt út á móti Stjörnunni (32 liða úrslit)

ÍR - mætir Selfossi í undanúrslitunum í kvöld

Akureyri - mætir Stjörnunni í undanúrslitunum í kvöld

HK - datt út á móti FH (16 liða úrslit)

Afturelding - datt út á móti Akureyri (16 liða úrslit)

Valur - datt út á móti Selfossi (16 liða úrslit)