Situr í heiðurssæti hjá Bjartri framtíð

„Er þetta ekki bara „pretty face“ á listanum?,“ segir tónlistarmaðurinn Örn Elías Guðmundsson eða Mugison, spurður hvað það þýði að vera í heiðurssæti í Norðvesturkjördæmi fyrir Bjarta framtíð í komandi þingkosningum. „Nei, þetta er bara stuðningur við hópinn. Ef það gengur vel hefur maður efni á að leigja íbúð í bænum.“ Framboðslistinn var lagður fyrir stjórn þingflokksins Bjartrar framtíðar í gærkvöldi. Það var borgarfulltrúinn Óttarr Proppé sem sannfærði tónlistarmanninn um að ganga til liðs við flokkinn. „Fyrir mér er Óttarr Proppé bara Gandalfur. Hann er ekki af þessum heimi. Eftir stutt spjall við hann var ég sannfærður um að þetta væri málið,“ segir Mugison, greinilega spenntur fyrir sínu fyrsta framboði. Aðspurður segist hann verða pólitískari með aldrinum. „En ég er ekki vinstri, hægri, upp og niður. Eins og allir landsmenn veltir maður oft fyrir sér hlutunum. Um daginn var ég að mappa upp hvernig orkuiðnaðurinn á Íslandi er uppbyggður. Það fór heilt kvöld í að reyna að skilja þetta batterí. Eftir þrjá til fjóra tíma var ég engu nær en það væri gaman að geta kafað dýpra ofan í svona hluti. Er ekki hægt að hafa þetta einfaldara?.“ Mugison segir tónlist og stjórnmál fara vel saman eins og Einar Örn Benediktsson og Óttarr Proppé hafa þegar sannað. „Ef Björt framtíð nær mörgum tónlistarþenkjandi inn hljótum við að geta sett upp stúdíó eða æfingaaðstöðu í mötuneyti Alþingis. Ég held að það væri töff."