Ingólfur persónulega ábyrgur - þarf að greiða rúman milljarð

Ingólfur Helgason, fyrrverandi forstjóri Kaupþings, þarf að greiða rúman milljarð af lánum sem hann fékk til hlutabréfakaupa fyrir hrun. Héraðsdómur Reykjavíkur féllst á kröfu slitastjórnar Kaupþings um að hafna niðurfellingu á persónulegri ábyrgð Ingólfs á láni sem honum hafði verið veitt til hlutafjárkaupa. Lánið fékk hann í maí árið 2006.

Hæstiréttur Íslands hefur áður dæmt starfsmenn til þess að greiða af lánunum og því dómafordæmi var fylgt eftir í þessum dómi. Þó var hafnað kröfu slitastjórnar um eitt lán vegna vanreifunar og skorti á lögvörðum hagsmunum. Málið var gríðarlega umdeilt þegar fréttir voru sagðar um það árið 2008.

Þá var máli slitastjórnar Kaupþings, gegn Steingrími P. Kárasyni, fyrrverandi yfirmanni áhættustýringar, vísað frá dómi í morgun. Málið snerist einnig um lán sem Steingrímur hafði tekið til hlutabréfakaupa. Dómnum þótti óljóst hver ætti þá kröfu, Kaupþing eða Arion banki sem reistur var á rústum Kaupþings.