Nýi RÚV-bíllinn er ofurgræja

RÚV ohf. hefur eignast nýjan útsendingarbíl sem kostar litlar 85 milljónir en við bætist annað eins við í kostnaði við tæknibúnað. Tæknimenn á RÚV er ánægðir með gripinn.

„Já, eða allt að því,“ sagði Guðmundur Einarsson tæknistjóri hjá RUV ohf kátur þegar hann var spurður hvort nýi tæknibíll Ríkisútvarpsins gæti flogið?

Bylting fyrir tæknimennina

Um er að ræða Renault-bíl sem Ríkisútvarpsmenn keyptu frá Ítalíu. „Já, við fengum hann notaðan þaðan. Við erum rétt um það bil að klára að standsetja hann og að nota hann með okkar gamla. Þau eru nokkur verkefni sem liggja fyrir og já, við verðum klárir í þennan umdeilda leik,“ segir Guðmundur. Bíllinn verður til dæmis notaður til að senda út frá íþróttaviðburðum og landsleikjum, það vill einmitt svo skemmtilega til að hann verður tilbúinn fyrir hinn undeilda leik við Króatatíu. „Við fengum hann ekki fullbúinn. En, við erum búnir að koma fyrir slatta af tækjum í hann.“ Guðmundur segir löngu tímabært að endurnýja bílinn. Sá gamli er árgerð ´86 en þess er árgerð 2011. Í þeim gamla er 3. kynslóð af myndavélum.

Guðmundi vefst tunga um tönn þegar hann er spurður hversu mikið bíll sem þessi kostar? „Ég er ekki rétti maðurinn til að svara því. Ég er bara hérna á gólfinu. Þú verður að tala við Jón Pál.“

Partur af HD-væðingu

En, Jón Páll Pálsson deildarstjóri segist bara vera með tæknireksturinn á sinni könnu. Segir að rétt sé að inna hann Hannes eftir því hvað svona gripur kostar. „En, þetta er endurnýjun á 25 ára gömlum ´bil. Útsendingarbíll. Gamli er fimm kamerubíll en þessi tíu. Við stefnum að því fyrir lok 2016 að hafa allar útsendingar í HD-merki. Þetta er partur af HD-væðingunni. Nú erum við sveittir við að klára allar tengingar. Erum aðeins byrjaðir að nota hann. Hann er núna í Korpu en þar erum við í samvinnu við Saga Film að taka upp laugardagsþáttinn Vertu viss, spurningaþáttur á laugardegi,“ segir Jón Páll.

Gaman er að segja frá því að það kemur sér vel að vera með tvo útsendingarbíla nú þegar landsleikurinn verður sýndur. „Króatarnir vilja sér stúdíó. Þetta verður ein stærsta fótboltaútsending sem við höfum gert. En, Króatarnir nota gamla bílinn. Þeir eru í SD-merkinu; Standard Definition.“

En, hvað kostar bíllinn?

En, hvað kostar bíllinn? Hannes Jóhannsson er forstöðumaður hjá Ríkissjónvarpinu og hann segist ekki vita hversu opinberar þær upplýsingar eru? „Við keyptum bílinn notaðan frá Ítalíu. Af fyrirtæki sem er í útleigu á bílum. Við keyptum hann myndavélalausan. Svo var farið í útboð á myndavélapakkanum sem er stór hluti af þessu. Við tókum lægsta tilboði í tíu myndavélar og fórum mjög vel út úr því. Ég held að við séum með þennan bíl í svakalega fínum málum peningalega séð. En, verð að biðja þig vinsamlegast að tala við hann Bjarna um kostnaðinn.“

Varaútsendingarbúnaður fyrir RÚV

Bjarni Guðmundsson er framkvæmdastjóri hjá RÚV ohf. „Þetta er upptöku- og útsendingarbíll sem notaður verður við upptökur á viðburðum svo sem umspilsleik íslenska landsliðsins, sem fram fer á Laugardalsvelli 15. nóvember. Bíllinn verður líka notaður við yfirgang í HD-væðingunni, auk þess að vera notaður sem varaútsendingarbúnaður fyrir sjónvarpið. Með kaupunum á bílnum fylgdi rafstöðvarbíll og samtals kostuðu bílarnir 85 milljónir króna.“

Og, þá er ótalinn kostnaður við tækjabúnað sem, eins og Hannes segir, er stór hluti kostnaðar.