Króatískar bullur eru blankar

Ivica Gregoric húsasmíðameistari er af króatísku bergi brotinn. Hann er spenntur fyrir leiknum og telur nánast engar líkur á því að hingað til lands slæðist vandalar og bullur sem stundum fylgja króatíska liðinu.

Ivica kom til Íslands árið 1997, kona hans er íslensk og krakkarnir tveir fæddust hér. Hann segist halda með Króatíu en hvernig sem fer stendur hann uppi sem sigurvegari. Ivica segir þá sem hér eru búsettir og koma frá Króatíu ekki nándar eins stóran hóp og til dæmis þeir sem koma frá Póllandi, en þeir halda hópinn og standa fyrir skipulögðum viðburðum. Sjálfur tilheyrir hann þéttum hópi fjölskyldumeðlima og vina sem reynir að hittast einu sinni í mánuði og þeir ætla að mæta á leikinn. Og eru spenntir.

Og, þið haldið með Króatíu?

„Já, auðvitað. En, ég kom til Íslands 1997. Konan mín er íslensk, krakkarnir 10 og 12 ára, eru fæddir á Íslandi. Ég verð ekki í vondu skapi ef Krótatía tapar. Því þá myndi Ísland fara áfram á HM sem er miklu meira afrek fyrir Ísland. Króatía á örugglega eftir að fara aftur á HM og í Evrópukeppni þó þeir tapi þessu einvígi,“ segir Ivica sem viðurkennir fúslega að sveiflast nokkuð í afstöðu sinni.

„En, þetta er rosalega spennandi og skemmtilegur tími. Margir hringja í mig og spyrja með hverjum ætlar þú að standa. Mikil pressa. Aldrei upplifað eins mikinn undirbúning fyrir leikinn og nú er hjá íslenska liðinu. Gaman fyrir okkur.“

Ivica og félagar fengu miða í gegnum Króatíska knattspyrnusambandið. Króatíska liðið var nýverið sektað vegna framgöngu stuðningsmanna sem reyndust hinar mestu bullur. Ivica telur ekki mikla ástæðu til að hafa áhyggjur af því.

„Já, sko. Það var hringt í mig frá króatískum fjölmiðlum og þeir spurðu einnig út í þetta. Það sem ég veit, er að þetta eru harðir stuðningsmenn frá liðum eins og Dinamo Zagreb og Hajduk Split. Þetta eru menn sem ferðast um alla Evrópu og yfirleitt á puttanum og reyna að útvega sér sem ódýrasta flugmiða og ég hef enga trú á að slíkir menn séu að koma á leikinn. Í fyrsta lagi er þetta alltof dýrt,“ segir Ivica og bendir á að íslenska og króatíska knattspyrnusambandið hafi náið samstarf um þetta við lögregluna. „Þessir menn fengu ekki einu sinni miða í gegnum króatíska knattspyrnusambandið. Þannig að ég hef engar áhyggjur af þessu. En ég skil vel að Íslendingar hafi áhyggjur af þessu því þetta er mikilvægur leikur.

Ivica Gregoric segir að hann hafi orðið fyrir nokkrum vonbrigðum þegar hann fékk að vita hvernig staðið yrði að málum: „Mér skilst að við, stuðningsmenn króatíska liðsins, verðum settir í einskonar búr. Og mér finnst það nú einum of. En maður skilur að þeir sem sjá um öryggið vilji ekki taka neina áhættu. En, ég er 99 prósent viss um að það verði engin vandræði. Það fylgir náttúrlega einhver drykkja og stemmning eins og alltaf er. En þetta fólk sem er að koma til Íslands, þetta eru meira og minna fjölskyldumenn. Og áhugamenn um íþróttir. Ekki menn sem eru að koma hingað til að verða til vandræða.“