Jón Gnarr með gervigreindarútgáfu af sjálfum sér í smíðum

NEXPO-verðlaunin fóru fram síðustu helgi. Fulltrúar tilnefndra og áhugamenn um netið og markaðssetningu mættu í Bíó Paradís til að fylgjast með. Viðburðafyrirtækið Silent stendur að verðlaununum og tók saman skemmtilegt myndband þar sem rætt er við nokkra verðlaunahafa. Hægt er að sjá myndbandið í spilaranum hér fyrir ofan. Rætt er við Magnús Hafliðason, markaðsstjóra Dominos, Þóri Ingvarsson rannsóknarlögreglumann, Einar Ben hjá Tjarnargötunni, Elmar Johnson hjá Guide To Iceland, Sigurð Val, vörumerkjastjóra Appelsín og Jón Gnarr borgarstjóra. Jón Gnarr var valin vefhetja ársins fyrir framkomu sína á Facebook. Hann var samur við sig og lét nokkur óhefðbundin ummæli falla eftir að hafa tekið á móti verðlaununum. Þar á meðal um að hann sé með gervigreindarútgáfu af sjálfum sér í smíðum til að sinna verkefnum hans á internetinu. "Svokallað clever-bot. Þetta finnst mér ákaflega heillandi. Það geta allir verið guð með internetinu," segir Jón. Þetta var í þriðja skipti sem Nexpo-verðlaunin voru veitt. Lögreglan á höfuðborgarsvæðinu valin áhrifamesta fyrirtækið á samskiptamiðli. Þá hlaut Dominos verðlaun fyrir Smáforrit eða app ársins. Ölgerðin hlaut verðlaun fyrir herferð ársins, Appelsín í allt sumar og Bjartasta vonin var Tjarnargatan. Vefur ársins var Guidetoiceland.is og óhefðbundin auglýsing árins var Vitamin Water - Þjóðhátíð blásin af.