Ég er með breitt bak

Róbert Örn Óskarsson hefur farið á kostum á milli stanganna hjá Íslandsmeisturum FH í byrjun tímabils. Hafnfirðingar sækja Breiðablik heim í kvöld.

„Leikurinn leggst bara þrusuvel í mig. Við höfum byrjað mótið ágætlega og eigum von á hörkuleik,“ segir Róbert Örn Óskarsson, markvörður FH. FH-ingar eru taplausir eftir þrjá leiki og markvörðurinn 25 ára hefur aðeins tvisvar sinnum þurft að hirða knöttinn úr neti sínu.

„Þetta hefur gengið ágætlega. Þessir þrír leikir hjálpa mér þó lítið á móti Breiðabliki nema hvað sjálfstraustið varðar,“ segir Róbert Örn. Hann segir sjálfstraustið gott en er meðvitaður um að það geti breyst hratt sé hausinn ekki rétt skrúfaður á.

Það vakti töluverða athygli síðastliðið haust þegar Gunnleifur Gunnleifsson, þáverandi markvörður og fyrirliði FH-inga, söðlaði um og gekk í raðir Breiðabliks. FH vildi ekki skuldbinda sig til lengri tíma við Gunnleif en setti þess í stað traust sitt á Róbert Örn sem aðeins hafði reynslu úr neðri deildum Íslands.

„Ég gerði nokkur mistök á undirbúningstímabilinu sem ég vissi að ég myndi gera. En ég vil miklu frekar gera mistök yfir veturinn heldur en á miðju tímabili.“

Töluvert var slúðrað í vor um að FH-ingar væru á höttunum eftir reynslumeiri markverði. Róbert segir umræðuna ekkert hafa truflað sig.

„Hún hefði kannski gert það hefði ég ekki notið svo mikils trausts hjá stjórn, þjálfurum og leikmönnum FH,“ segir Róbert Örn. „Menn mega tala eins og þeir vilja því ég er með breitt bak. En á meðan FH-liðið treystir mér þá er ég sáttur.“

Leikur Breiðabliks og FH hefst klukkan 20 og verður í beinni útsendingu á Stöð 2 Sport. 

Leikir kvöldsins

19.15 ÍA - Fram

19.15 Stjarnan - Valur

20.00 Breiðablik - FH