Eftirmaður Sam Tillen hjá Fram fundinn

Jordan Halsman, 21 árs vinstri bakvörður frá Skotlandi, hefur samið við Fram um að leika með liðinu í efstu deild í sumar. Frá þessu er greint á heimasíðu Fram.

Halsman er sagður alla jafna leika í stöðu bakvarðar en Framara vantaði örvfættan bakvörð eftir að Sam Tillen gekk til liðs við FH. Halsman á þó einnig að geta leyst stöðu vinstri kantmanns af hendi.

Halsman er uppalinn hjá Aberdeen í Skotlandi, en gekk til liðs við Motherwell fyrir þremur árum.  Hann lék um hríð sem lánsmaður með Annan Athletic, Dumbarton og Albion Rovers í Skotlandi og gekk í fyrra til liðs við fyrstu deildar lið Greenock Morton.

Halsman er væntanlegur til landsins fyrir helgi. Framarar sækja Víking heim í Ólafsvík í 1. umferð Pepsi-deildar karla á sunnudag. Leikurinn verður í beinni útsendingu á Stöð 2 Sport.