Námsmenn fá ekki námsmannaafslátt á leikskólagjaldi

Ungt par með barn fær ekki námsmannaafslátt á leikskólagjaldi hjá Leikskólum Reykjavíkur þrátt fyrir að vera bæði í fullu námi og á námslánum.

Móðirin er í sjúkraliðanámi og faðirinn í kennaranámi Tónlistarskóla FÍH.

Samkvæmt svari frá leikskólasviði til foreldranna er allt nám sem er lánshæft hjá Lín tekið gilt, en þau eru bæði í lánshæfu námi og á fullum námslánum.

En svo segir einnig í svarinu að það þurfi að koma fram einingafjöldi á vottorði frá skóla.

Námið hjá Tónlistarskóla FÍH er ekki bundið einingum en skólastjórinn hefur sent leikskólasviði vottorð þar sem hann staðfestir að faðirinn stundi fullt nám.

Það dugði þó ekki til og fengu foreldrarnir höfnun á námsmannaafslætti í bréfi frá leikskólasviði í gær en þar stóð að það vantaði að geta fjölda eininga sem faðirinn tekur í Tónlistarskóla FÍH.

„Þarna er verið að einblína á smáatriði. Það eru gerðar sömu kröfur til að fá námslán hjá LÍN og að fá afslátt hjá leikskólasviði. Þannig að ef ég uppfylli kröfur LÍN þá hlýt ég að uppfylla kröfur leikskólasviðs. Þetta er bara smámunasemi, og ég mun fara með þetta lengra,“ segir Arnar Pétur Stefánsson, faðir og nemandi Tónlistarskóla FÍH.

Þegar Vísir hafði samband við leikskólasvið Reykjavíkurborgar var bent á bréfið sem foreldrunum var sent, þar sem þau fá höfnun vegna vöntun á upplýsingum um einingafjölda.

Foreldrarnir þurfa því að borga 30 þúsund krónur, sem er fullt gjald, í stað 14 þúsund króna námsmannagjalds fyrir þriggja ára son sinn.

„Við ætlum ekki að borga leikskólagjaldið fyrr en þetta mál er búið. Við gefumst ekkert upp, það er hreinlega verið að mismuna skólum í þessu máli,“ segir Aníka Eyrún Sigurðardóttir, móðir og sjúkraliðanemi.