Vilja klára aðildarviðræður og kjósa

Alþýðusamband Íslands, Samtök atvinnulífsins og Viðskiptaráð Íslands „telja öll æskilegt að aðildarviðræðum við ESB verði lokið og að besti fáanlegur samningur um aðild verði borinn upp í þjóðaratkvæðagreiðslu,“ eins og segir í bréfi forsvarsmanna samtakanna til forsætisráðherra. Samtökin vilja samstarf við ríkisstjórnina um úttekt á stöðu aðildarviðræðnanna, eins og Fréttablaðið greindi frá í gær.

Í bréfinu, sem Bjarni Benediktsson fjármálaráðherra og Gunnar Bragi Sveinsson utanríkisráðherra fengu afrit af, segir að samtökin þrenn hyggist standa fyrir úttekt á aðildarviðræðum við Evrópusambandið, þróun ESB og valkostum í efnahagsmálum. Samtökin telja meðal annars mikilvægt að meta hvaða áhrif hléið sem ríkisstjórnin hefur gert á viðræðunum hafi á framvindu þeirra. Í fylgiskjali með bréfinu segir að skoða þurfi með hvaða hætti viðræður yrðu teknar upp að nýju ef vilji stæði til þess og svara spurningum eins og þeirri hvort aðildarviðræðum yrði haldið áfram þar sem frá var horfið eða hvort taka þyrfti upp að nýju mál sem þegar hefur verið lokið.

„Liður í úttektinni verði einnig að kanna kosti og galla þeirra leiða sem koma til greina til að tryggja hér á landi til langframa stöðugleika í gengis- og peningamálum, verðlagi og festu í stjórn efnahagsmála og um leið hvernig unnt sé að skapa umgjörð fyrir öflugt atvinnulíf og búa heimilunum lífskjör í fremstu röð,“ segir í fylgiskjalinu.

Samtökin telja að úttektin á stöðu viðræðnanna og þróun mála í ESB, sem stjórnarsáttmálinn kveður á um, og úttekt þeirra geti farið vel saman og bjóða ríkisstjórninni samstarf. „Telji stjórnvöld ekki ávinning af slíku samstarfi munu samtökin engu að síður standa fyrir úttekt á þessum málum,“ segir í bréfinu sem Gylfi Arnbjörnsson, forseti ASÍ, Þorsteinn Víglundsson, framkvæmdastjóri SA, og Hreggviður Jónsson, formaður Viðskiptaráðs, undirrita.

Afstaða þriggja manna

Sigmundur Davíð Gunnlaugsson forsætisráðherra segir að ríkisstjórnin hafi ekki haft tækifæri til að ræða bréf vinnumarkaðssamtakanna.

„Þetta er væntanlega liður í því að kynna ákveðin sjónarmið sem forystumenn þessara samtaka hafa staðið fyrir alllengi þótt það sé ekki endilega í samræmi við afstöðu allra félagsmanna þeirra. En það kemur reyndar fram í bréfinu hvaða niðurstöðu þeir vilja fá og þá er spurning hvort þeir hafi einhverja þörf fyrir aðkomu ríkisstjórnarinnar,“ segir Sigmundur. 

Hann segir að ætlunin sé að gera faglega úttekt á vegum ríkisstjórnarinnar, sem varpi ljósi á staðreyndir málsins. Þá liggi afstaða stjórnarinnar í ESB-málum fyrir.

„Það liggur fyrir að hún er ólík afstöðu þessara þriggja manna eða hversu stór sem þessi hópur er. Það er hins vegar ekkert að því að skoða öll erindin sem berast frá þeim og við gerum það af opnum hug. En áhersla okkar verður á þessa hlutlausu og faglegu úttekt til þess að umræðan geti byggst á staðreyndum en ekki skjali sem er ætlað að ná fram ákveðinni fyrir fram mótaðri afstöðu.“