Sækja lækna frá útlöndum

Landspítalinn mun á næstunni auglýsa eftir læknum á erlendum vettvangi. Til að uppræta landlægan læknaskort þarf á annað hundrað lækna til starfa.

„Við ætlum að taka upp þráðinn fljótlega og athuga hvað við getum gert, ekki síst í þeim sérgreinum þar sem vantar lækna. Það verður gert innan Evrópska efnahagssvæðisins og víðar, en það er töluvert atvinnuleysi í röðum lækna í Evrópu enda ríkir alþjóðleg samkeppni um þetta vinnuafl,“ segir Björn Zoëga, forstjóri Landspítalans.

Í vor auglýsti Landspítalinn eftir krabbameinslæknum en það skilaði takmörkuðum árangri, segir Björn. Hann bætir við að hefð sé fyrir því á Norðurlöndunum að ráða erlenda lækna til starfa. Nefnir hann gríska og pólska lækna sem dæmi. „Það er verið að skoða þetta á ákveðnum sviðum þar sem tilfinnanlegasti skorturinn er, sem er alls ekki alls staðar. Eins og staðan er núna hefur það ekki verið tekið saman nákvæmlega hvað vantar marga lækna í heildina en það vantar tíu til tólf deildarlækna og það vantar lækna í ákveðnum sérgreinum, eins og komið hefur fram.“

Geir Gunnlaugsson landlæknir segir að þessi þróun komi sér ekki á óvart og þegar sé góð reynsla af því að ráða erlenda lækna til starfa á Íslandi. Geir segir ekkert í regluverkinu útiloka að læknar með fullgild leyfi sæki hingað til vinnu. Það sé hins vegar viðkomandi heilbrigðisstofnunar að velja hvaða störf henta fyrir þennan hóp lækna, en tungumálaörðugleikar komi helst upp í hugann hvað varðar vandkvæði við að ráða erlenda lækna hingað.

Spurður hvort lausnin við læknaskorti hérlendis sé að sækja vinnuaflið erlendis frá segist Geir sjá það fyrir sér að samsetning lækna sem hér starfa muni breytast á komandi árum. „Þetta er lausn sem heilbrigðisstofnanirnar hljóta að skoða. Það eru allir aðrir að gera þetta í löndunum í kringum okkur og það er ekkert lögmál að einungis íslenskir læknar starfi hér á landi.“



Vantar allt að 200 lækna til starfa

Úttekt Læknafélags Íslands í byrjun árs sýnir að starfandi læknar á Íslandi eru ríflega 1.060 talsins. Að því er næst verður komist þarf alls um 200 lækna til viðbótar til starfa. Á það bæði við um heimilis- og sérfræðilækna. Þá glíma flestar eða allar heilbrigðisstofnanir hérlendis við þennan vanda.