Leggja 136 milljónir í að opna Vífilsstaði

Lagt verður til á Alþingi að veita 136 milljóna króna aukafjárveitingu á þessu ári til öldrunarþjónustu á Vífilsstöðum. Ríkisstjórnin samþykkti á fundi í morgun tillögu Kristján Þórs Júlíussonar um að opna hjúkrunarheimili á ný á Vífilsstöðum með 42 rýmum.

Opnun Vífilsstaða er í samræmi við áætlun um aðgerðir sem ráðherra og forstjóri Landspítala kynntu fyrir skömmu og er ætlað að létta álagi af lyflækningasviði Landspítala og mæta þörf fólks sem bíður eftir varanlegri dvöl á hjúkrunarheimili og er með gilt færni- og heilsumat.

Stefnt er að því að hefja starfsemi á Vífilsstöðum sem fyrst en líklegt er að opnun hjúkrunarrýma verði í áföngum eftir því hvernig gengur að manna stöður við heimilið.

Áætlaður rekstrarkostnaður hjúkrunarheimilis á Vífilsstöðum er um 349 milljónir króna á ári en kostnaður sem fellur til á þessu ári er áætlaður um 136 milljónir króna.