Sakar Gylfa um kerfisbundnar rangfærslur

Heiðar Már Guðjónsson hagfræðingur gagnrýnir Gylfa Magnússon, dósent við Háskóla Íslands og fyrrverandi viðskiptaráðherra, harðlega í innsendri grein í Fréttablaðinu í morgun.

Heiðar Már tiltekur fjölmörg dæmi þess í greininni sem að sýna, að hans mati, „...að mat Gylfa Magnússonar er ekkert til að byggja á."

Heiðar minnist ummæla Gylfa þess efnis að Ísland yrði „Kúba norðursins" ef ekki yrði skrifað undir fyrstu samninganna vegna Icesave-reikninganna. Ísland gæti ekki fengið alþjóðlega lán en annað hafi komið á daginn.

„Síðan þess hefur ríkissjóður sótt sér lán alþjóðlega, fyrst einn milljarð dollara árið 2011 og aftur sömu fjárhæð árið 2012, þrátt fyrir að IceSave væri enn ófrágengið," ritar Heiðar og bætir við „...að samningurinn sem Gylfi vildi samþykkja hefði væntanlega valdið greiðslufalli ríkisins."

Þá nefnir Heiðar Már til hlutverk Gylfa sem viðskiptaráðherra þegar Landsbankinn var endurreistur sem ríkisbanki.

„Eins ákvað Gylfi að taka ekki sérstaklega út þá áhættu sem var af gengsibundnum lánum bankans, heldur lét ríkið taka það eignasafn yfir, sem síðan rýrnaði stórkostlega þegar dómar féllu um ólögmæti lánanna," skrifar Heiðar. Hann minnir á löfræðiálit um ólögmæti lánanna sem Seðlbankinn sendi frá sér.

Auk þess bendir Heiðar Már á að viðmót Gylfa sem stjórnarmaður í Orkuveitu Reykjavíkur hafi orðið til þess gjöld til almennings hafi hækkað gríðarlega á síðustu árum. Þá segir Heiðar Már að fullyrðingar Gylfa í fjölmiðlum varðandi skuldastöðu þjóðarinnar og afgang af viðskiptum ekki standast neina skoðun.

Gylfi Magnússon sagðist í samtali við Vísi í dag reikna með því að svara grein Heiðars Más á sama vettvangi.

Tengil á grein Heiðars Más má sjá hér fyrir neðan.