Sala á lambakjöti féll eftir hrunið á Íslandi

Sala á kindakjöti snarféll eftir hrunið 2008 og hefur lítið hjarnað við síðan.

Sigurður Eyþórsson, framkvæmdastjóri Landssambands sauðfjárbænda, telur að stærsta einstaka skýringin á samdrætti í sölu kindakjöts sé mun meira framboð á fersku alifugla- og svínakjöti.

„95 prósent kindakjöts falla til í sláturtíðinni í september og október og mest af framleiðslunni er selt frosið allt til næstu sláturtíðar. Það hefur örugglega haft áhrif á neysluna því það er ekki alltaf hentugt að grípa með sér frosið kjöt, og kindakjöt hefur ekki sterka stöðu á skyndibitamarkaðnum,“ segir Sigurður.

„Neyslan sótti einfaldlega í ódýrari vöru,“ segir Andrés Magnússon, framkvæmdastjóri Samtaka verslunar og þjónustu. „Vörur sem voru hættar að seljast rjúka út sem aldrei fyrr, en þetta eru einfaldlega einkenni kreppu.“

Sigurður segist ekki óttast að framleiðendur kindakjöts séu að tapa slagnum við aðrar kjötvörur. Minni sala hér hafi ekki haft áhrif á greinina í heild. „Það eru líka ágætis markaðir erlendis sem bæta það upp sem gefur eftir innanlands.“

Nánar er fjallað um málið í Fréttablaðinu í dag.