Hæstiréttur dæmdi Karl Vigni í sjö ára fangelsi

Karl Vignir Þorsteinsson var dæmdur í sjö ára fangelsi í Hæstarétti í dag. Hæstiréttur staðfesti dóm Héraðsdóms Reykjavíkur sem hafði áður dæmt Karl Vigni í sjö ára fangelsi.

Dómur Hæstiréttar þyngdi aðeins dóm Hérðasdóms Reykjavíkur og hækkaði þær miskabætur sem Karl þarf að greiða fórnarlömbum sínum. Karl er dæmdur til að greiða þremur mönnum um 3 milljónir króna í miskabætur.

Karl Vignir var sakfelldur fyrir að nauðga þeim öllum og fyrir vændiskaup með því að greiða tveimur þeirra fyrir samræðið. Brot gegn fjórða manninum var fyrnt þegar rannsókn hófst og ekki var unnt að refsa honum fyrir að greiða þeim þriðja fyrir vændi, þar sem það var ekki lögbrot á þeim tíma.

Karl Vignir hefur setið í gæsluvarðhaldi síðan í janúar, eftir að Kastljós fjallaði ítarlega um áratugalangan brotaferil hans. Hann gekkst við brotum gegn tugum barna og ungmenna í þættinum og í kjölfarið bárust kærur á hendur honum vegna nýlegri brota, sem nú hafa leitt til dóms.

Í dómnum segir að brot Karls Vignis séu mjög alvarleg. Þau séu mörg og hafi staðið yfir langt tímabil. Brotavilji hans hafi verið einbeittur og brotin beinst að andlega fötluðum mönnum sem treystu honum og litu á hann sem vin sinn. Í dómnum segir að hann eigi sér engar málsbætur.