Íslendingaliðin drógust ekki saman í Meistaradeildinni

Þrjú Íslendingalið voru í pottinum þegar dregið var í átta liða úrslit Meistaradeildarinnar í handbolta í morgun og enginn þeirra drógust saman.

Kiel, lið Alfreðs Gíslasonar, Arons Pálmarssonar og Guðjóns Vals Sigurðssonar, drógst á móti ungverska liðinu Veszprém en liðin voru einmitt saman í riðlakeppninni. Kiel vann þá heimaleikinn 32–21 en tapaði 30-31 á útivelli.

Vive Targi Kielce, lið Þóris Ólafssonar, mætir Metalurg frá Makedóníu en þau voru einnig saman í riðli. Kielce vann þá heimaleikinn 21-20 og útileikinn 23-21 en pólska liðið vann alla leiki sína í riðlakeppninni.

Flensburg-Handewitt, lið Ólafs Gústafssonar og Arnórs Atlasonar mætir HSV Hamburg. Það verður því þýskur slagur í átta liða úrslitunum en eins og í hinum tveimur viðureignunum þá voru þessi lið saman í riðli. Flensburg vann þá heimavelli 29-26 en tapaði 28-31 á útivelli.

Fjórða viðureignin er síðan á milli spænsku félaganna Atletico Madrid og Barcelona sem er jafnframt eina viðureign átta liða úrslitanna sem er á milli liða sem hafa ekki mæst áður í keppninni í vetur.

Leikirnir í átta liða úrslitunum verða sýndir í beinni útsendingu á Stöð 2 Sport.



8 liða úrslit Meistaradeildarinnar 2012-2013:

Metalurg - Vive Targi Kielce

Atletico Madrid - Barcelona

Kiel - Veszprém

Flensburg-Handewitt - HSV Hamburg

Fyrri leikirnir fara fram 17. til 21. apríl en seinni leikirnir 24. til 28. apríl.