Nýráðinn þjálfari Þróttar: Ég veit allt um fótbolta

Þróttarar eru í fallbaráttu í 1. deild og þeir brugðu á það ráð að skipta um þjálfara í dag. Þá þurfti Þróttaragoðsögnin Páll Einarsson að víkja fyrir Serbanum Zoran Miljkovic.

Zoran hefur þjálfað bæði Leikni og Selfoss með góðum árangri hér á landi og hefur aldrei farið leynt með þann vilja sinn að þjálfa hér á landi.

"Þetta verður erfitt verkefni en við höfum nægan tíma til þess að snúa blaðinu við. Fólkið hjá Þrótti vildi prófa eitthvað nýtt og þess vegna hringdu þeir í mig. Takmarkið er eðlilega að halda sér í deildinni. Ég vil samt alltaf vinna alla leiki. Mín framtíðarsýn er að berjast á toppnum en ekki á botninum," sagði Zoran kokhraustur við Vísi í dag.

"Ég er mjög metnaðarfullur þjálfari og vil alltaf ná hámarksárangri. Ég er fæddur sigurvegari og mín ástríða er að vinna."

Þjálfarinn hefur verið fastagestur hér á landi síðustu ár og beðið eftir starfi. Það hefur varla farið fram leikur síðustu vikur hér á landi þar sem Zoran er fjarverandi.

"Það er kannski ekki alveg satt að ég hafi séð alla leiki. Ég kom til landsins fyrir þrem vikum síðan og hef séð leiki í öllum deildum. Ég hef séð að minnsta kosti 20 leiki á þessum þrem vikum.

"Ég er atvinnumaður og ég vil vinna á Íslandi því hér eru möguleikar á að gera góða hluti. Það er fullt af góðum leikmönnum hér á landi og miklir möguleikar á því að bæta sig. Þess vegna vil ég vinna hérna og þess vegna kem ég hingað á hverju ári."

Zoran segist hafa verið að vinna í heimalandi sínu og sé því alltaf með puttana í boltanum.

"Ég vil búa hér áfram og vera í vinnu hérna. Fótboltinn er mitt líf og vinna. Fótbolti er líka viðskipti," segir Zoran en hann hefur mikla trú á sjálfum sér og ætlar að koma inn af krafti.

"Ég var atvinnumaður í 15 ár og veit allt um fótbolta. Það er ekkert nýtt fyrir mér í þessum bransa. Ég er ríkur maður því ég hef þekkingu á öllu í fótbolta. Ég hef mikið sjálfstraust og er jákvæður. Það er nauðsynlegt. Annars á maður ekki möguleika á að ná árangri."