Vel heppnuð sameining við Álftanes

Gunnar Einarsson, bæjarstjóri í Garðabæ, hafnar því alfarið, sem að er látið að liggja í fréttaskýringu Morgunblaðsins, að sameining við Álftanes sé íþyngjandi fyrir sveitarfélagið og þannig misheppnuð.

Morgunblaðiðgreinir frá því í morgun að rekstur og skuldastaða Garðabæjar sé mun verri en gert var ráð fyrir í greinargerð sem kynnt var vegna sameiningar Garðabæjar og Álftaness fyrir rúmlega ári. Hermt er að skuldir hins sameinaða sveitafélags eru um 1,8 milljörðum hærri en áætlað var og „í lok næsta árs verða þær orðnar 2,8 milljörðum hærri en greiningin sagði til um. Þá kemur fram í drögum að fjárhagsáætlun áranna 2014-2017 að rekstrarafgangur þessa árs og næsta verði töluvert lægri en spár höfðu gert ráð fyrir, eða sem nemur samtals 541 milljónum,“ segir í blaðinu.

Fram kemur jafnframt að fyrir sameiningu Garðabæjar og Álftaness gerði ráðgjafarfyrirtækið R-3 skýrslu fyrir samstarfsnefnd sveitarfélaganna þar sem áhrif af sameiningu voru skoðuð, skýrsla sem svo, í ljósi þessa, reyndist kolröng. Gunnar Einarsson bæjarstjóri hafnar þessu alfarið í samtali við Vísi:

„Í greinargerð R-3 er ekki gert ráð fyrir eins miklum fjárfestingum og við höfum farið í á árinu 2013 og svo ´14. Við höfum verið að fjárfesta á árinu 2013 fyrir 1,2 milljarð og í okkar áætlunum fyrir árið 2014 er þetta um 1,3 milljarður. Það er gert ráð fyrir miklu minni fjárfestingu í greinargerð R-3 og ekkert óeðlilegt við það því ákvarðanir um þessar fjárfestingar liggja ekki fyrir þegar greinargerðin er gerð,“ segir Gunnar.

Bæjarstjórinn segir jafnframt að sem dæmi sé verið að taka ákvörðun um það núna fyrir árin 2014 til 2017 að byggja við einn skólann. „Síðan er náttúrlega eignarstaðan, miðað við þessar auknu skuldir, að sama skapi að batna. Það sem þó er mikilvægast og kemur alls ekki fram hjá Morgunblaðinu er að skuldahlutfallið er nánast nákvæmlega það sama og gert er ráð fyrir í greinargerð R-3 og ívið betra. Það er 105 prósent árið 2013 og mun fara niðrí alveg um hundrað prósent fyrir árið 2014. Það er hinn eiginlegi mælikvarði. Þannig að allt tal um að sameiningin hafi reynst íþyngjandi fyrir Garðabæ, það er bara ekki rétt.“

Þannig að þú vilt meina að sameiningin sé á áætlun og kannski vel svo?

„Jájájá. Og, við erum í mjög góðum málum hvað það allt varðar,“ segir Gunnar Einarsson.