Gestaliðin þurfa að mæta með bolta í útileiki

Það vakti athygli í leik KR og Breiðabliks í gær að leikið var með Nike-bolta en samkvæmt samningi á að spila með Adidas-bolta í Pepsi-deildinni.

Þetta á sér allt saman eðlilegar skýringar.

"Staðan er þannig að Adidas gat aðeins reddað 48 keppnisboltum en það var samþykkt seint að spila með A-týpu af Adidas-boltanum. Öll lið fengu aðeins fjóra bolta og þar sem það þarf 6-8 bolta á hverjum leik þá þarf útiliðið að koma með sína bolta og Blikarnir komu ekki með neina í gær," sagði Kristinn Kjærnested, formaður knattspyrnudeildar KR, við Vísi.

Þetta er afar sérstök staða og KR-ingar hafa til að mynda tekið boltana sína með til Eyja.

"Við eigum reyndar bara þrjá bolta því það sprakk einn af boltunum okkar. Þar sem það var ekki til nóg af boltum í þennan leik þá náðum við bara í boltana sem við notuðum í fyrra. Það var ekki hægt að vera með tvær týpur af boltum í leiknum."

Adidas-umboðið á Íslandi á von á fleiri boltum og öll lið í Pepsi-deildinni verða komin með fleiri bolta á næstu vikum. Þá geta útiliðin sleppt því að setja sína bolta í skottið.